Sinilerniarneq ajornartorsiutigaajuk? Qanoq iliorsinnaaninnut siunnersuutinik pitsaasunik aqqaneq marlunnik pissarsigit

Nal. ullaassakkut 2.32-inngortoq nal. akunnerpassui illuaniit illuanut saattaraluarlutit sinilersinnaanngilatit?

Nalunngilarput qanoq naalliunnarluinnartigisoq.

Siullermik aaku massakkorpiaq qanoq iliornissaannut siunnersuutit sisamat– sinileriartornissannut unnuallu naalluarnissaanut.

Taava ataani sinilluartarnissannut qanoq iliornissannut siunnersuutit arfineq pingasut. Sinilluarnissarmi akitsinnut tunnissat sioqqutingaatsiarlugu aallartereertarpoq.

Timip immikkoortukkuutaarlugu qasukkartikkiartuaarneragut, timit qaratsallu eqqissisakkit

Timi immikkoortukkuutaarlugu qasukkartikkiartuaarneranut isumassarsiatut tunulequtaasoq paasilertoruminarpoq: Siullermik nukiit sukassavatit. Sukasimatilaarallassavatit qasukkarlugillu Kingunera: Timi, eqqarsaatit misigissutsillu eqqississapput. Ajornannginnerusumillu sinilersinnaalissaatit.

Sungiusarnermi siullermi sunniuteqalereersarnera ilaasa misigisarpaat. Allat marlussoriarlutik sungiusaqqaartariaqarpaat. Sinnarliortaruit sap. ak. marlunni ullup ingerlanerani sungiusarnissaa isumassarsiatsialarujussuuvoq. Misiliisarnerit amerliartornerat ilutigalugu, unnuami atussagukku, sunniutaa pitsanngoriartussaaq.

4-7-8-anersaartorneq atorlugu eqqissigit

Mattuttut arnallu nunap pissarititai atorlugit nakorsaasartut ukiuni tuusintilikkaani ilisimavaat. Anersaartornikkut imminut eqqissisarsinnaavutit. Nal. ak. ataatsimik affarmilluunniit sivisussuseqartariaqanngilaq. Minutsit marluk naammakkajupput. Ass. videomi ataaniittumi sungiusaat imaattoq misiliguk:

• Sekundini sisamani ilummut anersaarit
• Sekundini arfineq marlunni anersaarnak
• Sekundini arfineq pingasuni silammut supillugu anersaarit

“Soorli iluaqutaassava?”

Tamatumani isertugaataasoq tassaavoq aalajangersimasumik anersaartorlutit; silammut anersaarnerpit ilummut anersaarnermiit sivisunerunera. Taamaaliornikkut qaratsanni eqqissisitsisartoq isumaminik aallartissaaq. Tillitit kigallissapput eqqarsaatitillu eqqissillutik.

Qulaani qasukkarsarluni sungiusarnertut misileqqaarnerani iluaqutaanissaa qulakkeerneqarsinnaanngilaq. Ilaat sungiusarnerulaartariaqarput. Amerlasuunili 4-7-8-anersaartorneq sinilluarsaatitut pitsaalluinnartuuvoq. Taamaammat naammagittarit ajornanngippallu sap. ak. marlunni ullut tamaasa sungiusaruk.

Eqqarsaatit akornusersuisut allakkit – poortorlugit toqqorneqarsinnaanngorlugit

Sinissaarukkaangavit ernumassutit eqqarsaatillu oqimaatsut annertusiartuinnartarput kaaviinnalersarlutillu. Eqqarsaatit akornusersuisut niaqqumit peersinniarlugit allannissaat, amerlasuunut iluaqutaasarpoq.

Ass. allattaavik kuglepen-ilu siniffippit eqqaaniitittakkit. Eqqarsaatitit allapallakkit imminullu oqarfigalutit aqagu takujumaarlugit. Taamaaliorneq eqqissinarpoq. Akuttunngitsunillu eqqarsaatigereerneranni ersarinnerujussuanngornerat misigissavat.

Nal. ullaassakkut 2.32, inunnut amerlanerpaanut ajornartorsiutinik aaqqiivigissallugu ajornavippoq.

Makigit, kamassaraluttuinnaruit

Siniffimmi innanganinni iluarusukkuit, innangaannarit. Sininngikkaluarlutit timit qasuersaarluassaaq. Kamassaraluttuinnaruilli sinilersinnaannginnerit nukillalaarutigalugu, taava makiinnaruit ajunnginneruvoq. Ass. qipiit nassarlugu inimi sofamut ingillutit TV-mi isiginnaarit, nipilersuummik sallatsumik tusarnaarit imal. atualaarit. Immaqa sinileriartuaarneq misigissavat.

Sinilerniarneq ajornakusoorpa? Ole sinnassaasup isummersuutaanik pissarsigit ?

Maanna massakkorpiaq sinilersinnaanngikkuit qanoq iliornissannut siunnersuutinik pitsasunik sisamanik pissarsivutit.

Sininnialernermili ileqqut pitsaasut innarnissaq sioqqutingaatsiarlugu aallartittarput.

Aaku sinilerniarneq ajornartorsiutigigajukkukku, suut maluginiarnissaannut qanorlu iliorsinnaaninnut isumassarsiat arfineq pingasut.

1. Innarfissaq nallertinnagu colatoqinak, kaffisoqinak eqeersaatitalinnillu allanik imeqinak

Nalunngereerunnarsivat: Cola, kaffi imeruersaatillu eqeernartortallit (energidrik) koffeinimik eqeernartumik akulerujussuusut. Taamaammat imminut unnuamilu sinilluarnissannut iluaquserit: Innarnissat al. ak. arlallit sioqqullugu tamakku unitsikkit.

Ullup ingerlanerani koffein qanoq annertutigisoq atortarnerit maluginiaruttaaq. Koffeinip suujunnaarsinnissaanut timip piffissaq atortarpaa. Ualereersoq tiitorfiit marluk kaffisorsimaguit eqeernatulimmillu emeruersarsimaguit, koffeinip nal. 23.00 suli timinniinnissaa ilimanarluinnassaaq.

2. Timigissartarit (innarfissarli sioqqutitsiarnagu)

Timigissarneq sorpassuarnut iluaqutaavoq– taakku ilagaat illit sininnissat! Eqqaamajulli: Sakkortuumik timigissarnerup timimut eqeernarnera. Taamaammat nalinginnaasumik innangajalernermi km-it tallimat sukkasuumik arpanneq isumassarsiatsialaanngilaq. Ullukkut siusinnerusukkut taamaaliortarit.

3. Oqarasuaat nipangersiguk (imal. suli pitsaanerusumik: Toqqoruk)

Okay, immaqa aamma ingasaatilaarparput: Kisiannili sinileruminaappoq mobilit nalunaarutisiannik kalerrisaareqattaartuarpat. ‘Hmm, kinamita nalunaartoq. arajutsisaqassanerlunga? Pingaaruteqarpammi?’

Sininnialeruit oqarasuaatit nipangersiguk. Imal. pitsaanerusumik: paasiniaaviginiarlugu ussernartorsioqqunak arlaannut toqqoruk.

4. Ualikkut sinittarnak

Ualikkut sinikulaarneq sivisuallaamillu sinittarneq, unnuami sinissamik akornusiisarput. Taamaammat unnukkut sinilerniarneq ajornartorsiutigigukku ualikkut sinittarunnaarnissannut immikkut ilisimasallit innersuussipput. Piffissami aalajangersimasumi ualikkut ilungersulaassagaluaruilluunniit.

5. Kissartumik qorlortitsivigalutit uffarit

Uhm, kissartumik qorlortitsivigaluni uffarneq tassa iluartoq! Taanna nammineq qasukkarnarlunilu iluarusunnarpoq. Aammali sininniarnissannut iluaqutaavoq.

Sooq?

Nassuiaataa paasilertoruminarpoq: Kissartumik qorlortitsiviginerit naammassippat timit nillulaassaaq. Taamaalippallu siniffissanngulersoq timinnut nalunarasuartoqassaaq. Pisariillunilu kinguneqarluartoq.

6. Minutsini tallimani silaannarissaagit

Kiassaat tamakkersortoq sinilluarnanngilaq. Sinnarliornarlunili. Ini sinittarfiit 18-21 gradinik kiassuseqassasoq, immikkut ilisimasallit innersuussutigaat.

‘Taavami qanoq ilillunga taakku eqqoqqissaarsinnaavakka?’ immaqa taama eqqarsassaatit. Tjah, kiassiummik pissarsiniarsinnaavutit … annikinnerusumilli iliuuseqarsinnaavutit. Ass. minutsit tallimat qulillu akornanni innarnissat sioqqullugu sinittarfik silaannarissaruk imal. igalaaq ikersillugu sinigit. Taava 18-21 graderit taakku eqqorsinnaanissaat ilimanaateqarluassaaq.

7. Maanna inuunermut akuersaarneq tunngavigalugu sungiusarnermik ulloq naggaseruk

Maanna inuunermut akuersaarneq tunngavigalugu sivikitsumik sungiusarluni ullup naggasernera, amerlasuut iluaraat. Taakku ilagaat Amanda. Taanna ima oqarpoq:

”Sininnialeraangama sungiusaatigisartagara tassaavoq, eqqarsaatikka pullartatut, tigullugit saannut ilisinnaasatut takorloornerat. Taamaaliornikkut anigortarpakka.”

Illit atorsinnaaviuk? Uani nassuiaanneqarlutit maanna inuunermut akuersaarneq tunngavigalugu sungiusarneq misiliguk.

8. Ullormut pisartut aalajangersimasut attatiinnakkit

Timit maskiinatut pitsaasutut ippoq. Ullut tamaasa aalajangersimakannersumik innartarfeqarlunilu makittarfeqaraanni sulilluarnerusarluni – aamma sap. ak. naanerini.

Eqqaamajuttaaq qanoq ilinerani sinittarnerpit soqutaanngitsuunnginnera. Inuusuttut unnuit tamaasa nal. ak. arfineq pingaasut qulillu akornanni ataannartumik sinittarnissaat, immikkut ilisimasallit innersuussutigaat.

Maanna sinittarnerit ajorpa?

Sinittarnerit ajorsisimappat, unnuami sininniarneq ajornakusoorpat, ualikkut sinilertaruit unnuamilu sinilluarsinnaanak, taava kisimiinngilluinnarputit!

Inuppassuit iluamik sinittannginnertik ilungersuutigaat. Massakkorpiarlu ajornakusooraluaq taamaattuaannartussatut isumaqanngilaq. Taamaammat unnuami eqqumallutit sinissaaleqineq nukillalaarutigigukku, isumatsaqinak. Qaangiutissaaq.

Ajornartorsiut taamaginnarpat qanoq iliussaanga?

Unnuarpassuit sinissaqarpiannginneq. Tamatigut tamaana pisaruni pissusissamisoorpoq. Imaassinnaavoq massakkorpiaq inuuninni annertuunik, tatisimannilaartunik pisoqartoq. Sivisuumilli taamaakkaanni oqaloqateqarnissaq isumassarsiatsialaavoq. Ass. angajoqqaatit, nakorsat, allaluunniit oqaluutissallugit toqqissinartitat.

Qanoq ililluni oqaloqateqarnissaq pillugu allaaserisami uani annertunerusunik paasisaqarsinnaavutit: Angajoqqaanik oqaloqateqarnissamut nassuiaat – ajornartorsiutinnik avitseqateqarnissannut patsisaasut pitsaasut arfinillit.

Taavalu oqaaqqissaarut:

Nakorsaq oqaluuteqqaarnagu sinissaatitunngisaannarit! Iisartakkat ajornartorsiut peernavianngilaat uerilersinnaavutillu. Inunnut amerlanerpaanut nakorsaatit sinnarliornermut aaqqiissutaanngilat.