Sungiusarneq nassuiaatitalik: pisariitsumik qasukkarneq

Massakkut qasukkarnissamut sungiusaat pisariitsoq ingerlassavat.

Aallarniutitut akornuserneqarnak sumiiffigisinnaasannik nassaarit.

Nallarit nissutit siaakkit avissaartillugillu.

Talitit timinnut talitillugit qasukkartikkit.

Tassanerpiaq nalaneq qanoq misinnarnersoq maluginiaruk.

Timivit nallakarfigisimasappillu attuumanerat maluginiaruk.

Nallanngaviit qanoq misinnarpa?

Manngerpa, aqippa, kissarpa, nillerpa allatulluunniit misinnarpa?

Anersaartornerit qanoq misinnarnersoq maluginiaruk. Sukkava imaluunniit kigaappa? Ajornanngila imaluunniit ilungersunarpa?

Massakkorpiaq qanoq anersaartornerit maluginiaannassavat.

Allanngortinniarsarinagu.

Massakkorpiaq naammassisassaqanngilatit. Aamma piumasaqaateqartoqanngilaq.

Ilummut silammullu anersaartornerit maluginiaannassavat.

Maanna takorlooruk niunnut isikkannullu allaat atasumik anersaartorlutit.

Nissutit isikkatillu qanoq misinnarnerat maluginiaruk.

Immaqa kissartutut imaluunniit nillertutut misinnarput?

Immaqa kakillalaartitsivutit?

Immaqaluunniit malugisaqanngivillutit?

Tamanna aamma ajunngilluinnarpoq. Tassaaginnarporlu malugisat.

Nissunnut isikkannullu atasumik anersaartornerup takorloorniarnera ajornakusoortikkukku aamma ajunngilluinnarpoq.

Taava anersaartorninni maluginiakkat ersarinnerpaaq maluginiaannassavat.

Maanna timimi nukiit sukallugillu qasuttaqattaassavagut. Nissut isikkallu aallarniutigissavagut.

Siullermik nissunni nukiit tamasa sukakkit. Isikkavillu qaavi tasillugittaaq ammut peqikkit.

Taamaasisimatsiarit. Taava nissutit isikkatillu qasukkarteqqikkit.

Manna nissutit qanoq misinnarpat. Eqqissisimappat? Sukasimasoqarpa? Kissappat?

Imaluunniit kakillalaartitsivit?

Nangeqqissavarput: Nissutit siaarlugit qerattarlugit nukii sukakkit. Isikkatit peqikkit.

Tamaalisimaannarit.

Qasukkarlutillu. Nissuit isikkavillu nukiisa maanna siaarsimareerlutik qasukkarsimatinneqareerneranni qanoq innerat maluginiaruk.

Allannguutaasumik malugisaqarsinnaavit?

Maanna talinnut assannullu atasumik anersaartornerit takorlooruk. Talivit assavillu qanoq misinnarnerat maluginiaruk.

Immaqa kissartutut imaluunniit nillertutut misinnarput? Immaqa kakillalaartitsivutit?

Immaqaluunniit malugisaqanngivillutit? Tamanna aamma ajunngilluinnarpoq. Tassaniiginnarporlu malugisinnaasat.

Taamatuttaaq talinnut assannullu atasumik anersaartornerup takorloorniarnera ajornakusoortikkukku ajunngilaq.

Taava anersaartorninni maluginiakkat ersarinnerpaaq maluginiaannassavat.

Maanna illuttut assanni ujaraarannguamik sapinngisat tamaat eqeruluugaqarnerit takorlooruk.

Talitit siaarlugit nukii qerattarlugit sukakkit.

Taamaalisimalaatsiarit.

Taava talitit assatillu qasukkarteqqikkit.

 

Maanna qanoq misinnarpat? Eqqissisimappat imaluunniit kissarpat?

Sukasimasoqarpa imaluunniit ippinnartoqarpa? Kakillalaartoqarpa?

Nangeqqissavarput. Assatit sapinngisat tamaat sakkortuumik eqikkit talitillu sukallugit, siaavillugit qerattarlugit.

Taamaalisimatsiarit.

Qasukkarteqqillugillu. Assatit siaakkit talitillu qasukkartillugit timinnut tutsillugit nivingatikkit.

Maanna assatit talitillu qanoq misinnarnersut maluginiaruk. Qasukkarsimatiinnarnerisa qanoq misinnarnera maluginiaruk.

Maanna tunut maluginialissavat. Nallanngavinnut tunnganera maluginiaruk.

Anersaartornerit ilutigalugu tunuppit aalalaarnera immaqa malugisinnaavat.

Maanna tunut ikaartarfinngortillugulusooq tunuit qeqqa nallanngavinninngaanniit kigaatsumik qangattariartoruk.

Ikaartarfik manngersitillugu kiasitit makitsillu kisiisa tunngalersillugit qummut sukagit.

Kiasitit imminnut qanillisillugit qummut sukannerulaarit.

Taamaalisimatsiaannarit.

Taava tunut kigaatsumut tutsikkiartoruk. Qasukkarlutillu.

Tunut maanna qanoq misinnarnersoq maluginiaruk.

Kissattippa, qasukkarpa allarluinnarmilluunniit malussarpit?

Uteqqissavarput. Tunut ikaartarfiusanngorlugu qangattaruk.

Tunut manngertillugu kiasitillu imminnut qanillitillugit, nukiit sapinngisat tamaat sukallugit.

Taamaalisimatsiarit.

Tunut kigaatsumik tutsikkiartoruk.

Tunut tutsillugu qasukkarsimatinnerani maanna qanoq misinnarpa?

Maanna timippit saava maluginialissavat.

Naavit anersaartornerit ilutigalugu qaffattarnerat appaqqittarnerallu maluginiaruk.

Maanna ilummut itisuumik anersaarlutit, naatit silaannarmik ulikkaakkit.

Aqqaamagit.

Sulilaaq.

Kigaatsumik silammut anersaarit.

Maanna naatit qanoq misinnarnerat maluginiaruk.

Maanna sakissatit maluginialaassavatit.

Sakissatit ulikkaavillugit itisuumik ilummut anersaarit.

Aqqaamagit.

Silammut kigaatsumik supillugu anersaarit.

Nalinginnaasumik anersartorit. Puavillu sakissavillu qanoq misinnarnerat maluginiaruk.

Aappassaanik.

Sakissavit suanngartinnissaat tamakkerlugit itisuumik ilummut anersaarit.

Taamaalisimatsiarit. Silammullu kigaatsumik supillugu anersaarit.

Maanna nalinginnaasumik anersaartorninni, anersaartornerpit qanoq misinnarnera maluginiaruk.

Sakissanni qanoq misinnarnera maluginiaruk.

Immaqa qasukkarsimanerusutut misigaatit?

Maanna kiinnannut ingerlaqqippugut.

Kiinnat sapinngisat tamaat eqillugu misiliguk. Assersuutigalugu takorloorsinnaavat seernartumik ooqataarnerit.

Imaluunniit kiinnat kiinarpatut pappiaqqamik eqiteqqissaakkamik sanaatut takorlooruk.

Taamaalisimatsiarallaat.

Taava qasukkarit kiinnallu manissunngorteqqillugu. Maanna kiinnavit qanoq misinnarnera maluginiaruk. Qasukkarsimava?

Immaqaluunniit sukasimasoqarpa?

Aappassaaniissavarput.

Kiinnat eqiguk sapinngisallu tamaat eqisalutsinniarlugu. Taamaalitsiaannarit. Taavalu qasukkarlutit.

Kiinnat kigaatsumik siaartikkiartuaaruk. Maanna kiinnavit qanoq misinnarnera maluginiaruk.

Maanna nalaninni timit tamakkerlugu maluginiaruk.

Timit immikkoortukkuutaarlugu sukattareerpat. Maannakkullu timit tamakkerluni qasukkarteqqissaarsinnaavat.

Timit ataatsimoortutut maluginiaruk.

Qanoq misinnarpa? Qasukkarsimava? Qasoqqava? Oqimaappa imaluunniit oqippa?

Manna naggaserlugu kassinniit anersaartornerit takorlooruk.

Kiinnat aqqusaarlugu, sakissaniit qalasippit tungaanut.

Nissutit, isikkatit isikkavillu inuai aqqusaarlugit silammut anersaarnerit malinnaaffigiuk.

Nammineq taamaaliorit.

Kassinniit qalasippit isikkappillu tungaanut silammut nikittaatsikkit.

Taava isikkanniit qalasippi kassippillu tungaanut ilummut tassanngaanniillu aninsillugu.

Anersaartornerit maluginiaannaruk – silaannaq timinnut isaasoq aniasorlu – allanngortinniarsarinagu.

Ilummut anersaarnerpit tamatigut timinni nutaamik nukissanititsisarnera takorloorsinnaavat.

Silammullu anersaarninni qasukkariartuaartarlutit. Nukiit sukasimanerannit silammut supoorillutit.

Tassuugu oqalukkunnaassaanga.

Taamaakkaluartorli innangaannalaaqqunarputit immaqalu eqqissinerup kigaatsumik timinni siaruarnera malugalugu.

Imminut eqqaasigit unillatsiarneq nukissanik aallerneq timinnut tarninnullu qanoq iluaqutaatiginersoq.

Qujanaq tusarnaaravit.