Tamaammat annilaanganermut akiuutissalluni iluaqutaaneq ajorpoq

Meeraagallarama, oqaluttuat quilertanartut nuannareqaakka. Oqaluttuat ilaanni angut masarsummut qimaavoq, tassanilu sioqqanut iioraasunut marrilluni. Kiviumanani akiuulluni ilungersoraluarpoq, kinguneriinnarpaali kivigaluttuinnarnera. Naggataatigut assaata illua kisimi nuisalerpoq. Amiilaarnaqaaq – pingaartumik quliinnarnik ukioqarluni.

Annilaanganermulli qanoq attuumassuteqarpa?

Tassalu, sioqqanut iioraasunut akiuunneq, annilaanganermut akiuukkaanni qanoq pisoqartarneranut assersuutissaqqippoq. Qaqiniarluni tamaviaarluni akiuukkaanni, iioraasunut kivigalittuinnarnertulli, eqqarsaatit misigissutsillu artornartut peersikkusullugit akiorneri annertusiartortillugu, initunerulertarput. Ajornartorsiut tassaavoq, tunngaviusumik aqunneqarsinnaanngitsumik aqutsiniarsarinerit.

Minutsimi tulliuttumi sumilluunniit eqqarsaqquneqarnermik pinnguaat immaqa nalunngilat. ”Taamaallaalli nagguaatsoq aappaluartoq eqqarsaatigissanngilat.” Ilaa, ajornarluinnarpoq. Qanoq ilinngitsoq nagguaatsoq aappaluaartoq niaqqunni kaaviiaalissaaq. Taamatorpiaq pisoqassaaq immitsinnut oqarfigigutta: ”Taamak eqqarsassanngilanga,” imaluunniit ”Taamak misigissanngilanga”. Taamannak eqqarsarnaveersaarneq, eqqarsaatigerusunngisat initunerulersarneranik kinguneqartarpoq. Ilutsinnilu akiuunneq, kissaataajaalersarlunilu maluginiaasinnaassusiiartarpaatigut, massakkorpiarlu sumiiffimmik ukkassinissaq ajornakusuulersarluni.

Imaassinnaavoq nalliuttorsiortuniittutit, allanillu oqaluussaqarlutit nuannisarusukkaluarputit. Maluginiaasinnaassutsitilli, ilunni pisunit tiguarneqarsimappat, inuit oqaasii tusaasinnaajunnaarsinnaasarpatit.

Annilaanganerup akiorniarnera iluaqutaanngippat taava suna alla periarfissaava? Angutinnguakkuluk oqaluttuami amiilaarnartumiittoq uterfigilaariartigu.

Sioqqanit iioraasumit qaqiniarluni ilungersoraluttuinnarnini ilutigalugu kivigaluttuinnarpoq. Iioraasut qanoq aningorneqarsinnaaneranik ilisimasaqaraluaruni, akiuukkunnaarluni tunummut niverluni talini niunilu siaarlugit uninngassagaluarpoq. Taamaaliorunimi kiviartorunnaassagaluarpoq.

Unali sioqqanut iioraasunut tunngassuteqanngimmat, suna pillugu iluaqutaaneranik takisoorujussuarmik nassuiaatinngikkaluarlutit, maluginiangassaq pingaarnerpaaq oqaatigiinnassavara: Tassaavorlu ajornartorsiutinut aaqqiissutissat ilaat tassaasarpoq, eqqarsaatitta misigissutsittalu massakkorpiaq oqaluttuarnerisa akerlerluinnaanik iliorsinnaaneq.

Taamatuttaaq qisuariarnerit, annilaanganermut iluaatsumut akiuunniarneq, pissusissamisoorluinnarpoq. Taavami akiuunnitta asuli sakkortusippagu? Taavami annilaanganeq takkukkaangat ammaffigalugulu eqqissisimanissamik sungiusarneq aaqqiissutissaappat?

Ajornarluinnarsinnaasorinarnera isumaqatigaara. Imalu eqqarsassaguit paasisinnaalluarpara: ”Naamik taamaaliorsinnaanngilanga. Annilaanganerup iluaannera sakkortuallaarpoq.” Soorunalimi imaaliallaannaq ilikkagassaanngilaq. Annilaanganerli akiorniarsarinagu ammaffiginissaa sungiusaraanni, inituallaarunnaarnera amerlasuunit misigineqartarpoq. Taanna modulit pingajuanni sungiusarnerulissavat.

Taava naggasiillunga eqikkaagallarlanga: Ilisimassavat annilaanganermut akiuunnerup pissusissamisoorluinnarnera. Ilisimassavattaaq nalinginnaasumik sakkortusititsisarnera, ilinnullu initunerulersitsisarnera. Kiisalu annilaanganerup nutaamik pitsaanerusumillu iliuuseqarfiginissaata ilinniarsinnaanera ilisimassavat.

Videomi tulliuttumi annilanganermut iliuutaasartoq nalinginnaasoq, ajoraluartumillu iluaqutaarpianngittoq paasisaqarfingissuat. Tassalu qimarratiginninneq.