Imarisaanut uteqqigit

Modul 2: Lektioni 2

Annilaanganermit qimaaniarsarigaangatta ukua pingasut kingunerisinnaavai

Lektionip tullia

Opret bruger

Siuariartornermut kaammattuutinik nassitsittarusukkuit atuisutut atit pilersinneqarnerani nalunaarutinik nassitsittarnissat qinersinnaavat.

Suliassaq

Siunissami qaninnerusumi ungasinnerusumilu kingunissai

  1. Siunissami qaninnerusumi ungasinnerusumilu kingunissai

    Siuliani sungiusarninni allattukkatit maanna saqqummissavatit iliuusissatullu siunniussat assigiinngitsut inuuninnut kingunerisaat eqqarsaatigalugit. Piffissamut qaninnermut ungasinnermullu kingunerisaat eqqarsaatiginiarsarissavatit, assigiittuaannanngillammi.

    Kingunerisa pitsaasuusariaqaratillu ajortuusariaqannginnerat eqqaamassavat – iliuusissatut siunniussagut taakkunannga marlunnik kinguneqarajussinnaapput.

    Kingunerisaanik qulaajaanikkut, kingunerisa qanoq isumaqarfiginerat- ulluinnarnilu iliuusererusutannut pitsaasuunerat ajortuuneralluunniit, ajornannginnerusumik naliliivigisinnaassavat.

     

    Sammisassaq 4: Siunissami qaninnerusumi ungasinnerusumilu kingunissai

    Sap. ak. siuliani allattukkatit saqqummikkit. Allassimasoq assiliuk siunissamilu qaninnermi ungasinnermilu kingunissai ilanngutikkit.

    Ass. imaassinnaapput:

    Annilaangalersarpunga, __inuppassuaqarnerani pisiniarfiliassatillunga____ .
    Taamaattoqartillugu imaaliorniartarpunga  ___allanit oqaluunneqarsinnaajunnaarlunga siutequtsertarpunga ___.

    Siunissami qaninnerusumi kingunissai: Annilaanganera pissutigalugu ajornakusoortikkaluarlugu pisiniartarpunga. Nipinik inuillu allat oqalunnerannik ukkassinanga, pisiniarnissap ukkassinnaanissaanut periarfissaqalissaanga. Oqaluussaqartannginnamali avataaniittutut misigaanga.

    Siunissami ungasinnerusumi kingunissai: Annilaanganera pitsaaneruleranilu ajornerulissanngilaq, pisiassakkali isumannaarpakka. Imminut mattukkama ikinngutinnik ilisarisimasannillu ilassisaqanngilanga.

Haluukkut.

Angut inuusuttunnguaq nalunngisara pillugu oqaluttuaq aallarniutigigallarlara. Taanna Suulummik ateqarpoq. Ukiut marluk matuma siorna Suulut atuarfimmi allami atualerpoq. Aallaqqaammut ajunngitsumik ingerlavoq. Ullulli arlaanni pisoqariasaarpoq, tassa imaaliallannerinnarmi annilaangaleriataarpoq. Sunalu annilaangassusiginerlugu, sunalu pillugu timini taama qisuariarnersoq nalulluinnarpaa. Suulut anertikkalerlunilu uissannguleriasaarpoq, misigisimavorlu kikkunnit tamanit isikkunneqarluni. Iluaalliornaqaaq. Angerlapallappoq, piffissallu ingerlanerani eqqissivoq.

Misigisarli timaaniiginnarpoq. Suulut imminut mattukkaluttuinnarpoq, klassimilu atuaqatitaavi, pisuttuaqataasinnaanersoq imaluunniit angallammik angalaaqataasinnaanersoq aperigaangata, naaggaartalerluni. Imaanngittoq ilagerusunngikkai. Qanorli eqqarsassappat, siooraneq nassuiaatissartaqanngitsoq uteqqissappat, aqussinnaanngivikkuniullu?

Imaassinnaavoq illit nammineq misigisimasannut assingutikkit. Uanga nammineerlunga misigisimasannut assingutippara. Annilaanganermut siooraneq ima annertutigisutut misinnarsinnaavoq, allaat pisunit sammisanillu siornatigut inuunitsinni pingaarutilinnit tunuartilersissinnaalluta. Imaassinnaavoq Suuluttut inuit akornaniikkusukkunaartutit. Imaluunniit atuarnissaq ajornarluinnartutut annilaanganerup misinnarsisissinnaagaa. Aamma imaassinnaavoq misigissutsitit aqunniarsaralugit illoqarfiliaqataasutit, annilaanganerlu sivikitsumik annikillisittarmagu imigassartorpallaalaarlutit. Imaluunniit eqqarsaatinik misigissutsinillu nuanniittunik unikaallatsitsisartunik, TV-kkut isiginnaagassianik nangeqattaartunik isiginnaartualersutit, imaluunniit qarasaasiakkut pinnguaatinik pinnguartualersutit.

Tarnip pissusaanik immikkut ilisimasallit taaguuteqartippaat. Tassaavorlu pinngitsuuiniarneq. Tassalu aalajangersimasunik pissusilersortartugut annilaangalerumanata. Nalinginnaasumik massakkorpiaq oqiliallannermik misigititsisarpoq. ”Puuha, qujanaqaarmi peqataaniarnanga nalunaarama. Ajorluinnartumik kinguneqaqqajaqaaq.” immaqa eqqarsassuutit.

Pinngitsuuiniarnerli pingasunik kingunipiloqarpoq:

Kingunipilua siulleq tassaavoq pinngitsuuiniarnerup annilaanganermik annertunerulersitsisarnera. Annilaanganeq, aanaatut aarlerituallaatut, ajortorpassuarnik pisoqarsinnaaneranik takorluukkanik oqaluttuartutut eqqarsaatigisinnaavat. Aanaap aarlerituup oqarneratut iliuleruit, taava aarlerigisaasa tamarmik ilumoorsimasinnaanerat uppernarsassavat. Taamaaliornikkut nipi ilunniittoq pissaaneqarneruleraluttuinnassaaq. Tamatumalu peqatigisaanik nipip siooranerata ilumut eqqortuunerata misilinnissaanut periarfissat annaassavat.

Kingunipiluit aappaat tassaavoq annilaanganerup siaruariartortarnera. Inissaqartilerukkumi pissaaneqarfigilissavaatit. Taamaalillutillu sapikkatut misigisatit amerligaluttuinnassapput. Inuunerillu qumaraluttuinnartutut misinnarluni.

Kingunipiluit pingajuat tassaavoq pinngitsuuiniarneq, taassuma inuttut inuunerput tujorminarsisittarpaa naammagittaattunngortittarlutalu. Qamuuna ilukkut inuunererusutaq atornagu annernarpoq. Immaqalu ima eqqarsarputit: ”Sooruna imminut piumaffigiinnarsinnaanngitsunga, allatullu inuullunga?”

Sivikitsuinnarmik annilaanganerup pinngitsoortinniarnera akisuallaarujussualersinnaavoq. Taama oqareerluta, allatut iliorsinnaasimannginnavit qimaasimanerit pissusissamisoorluinnarpoq aammalu paasinarluni. Annilaanganeq siooranartorujussuuvoq. Taavali misilillugu imminut avoqqaareqinak. Tamatumunnga taarsiullugu annilaanganerup nutaamik iliuuseqarfiginissaata sungiusarnissaanut immaqa piffissanngornera, inussiarnersumik imminut oqarfigalutit misilissinnaavat. Iliuuserisaq ilinnik aqutsinanilu killiliinngitsoq.

Videumi tullermi, moduli una, annilaanganermik akiuinermut qimarratiginninnermullu sananeqaatitsinni iliuuseqariataartarnitsinnut tunngassuteqartoq, eqikkaavigissavarput. Taava periuseq alla pitsaanerusoq takutissavara.