Inuunerup ingerlarnani imminut isumassorit

Una takorluulaariaruk. Qaqqasiorputit. Issingaarmat qingat qerrutilerpoq. Nammattakkat oqimaannermut tuitit annernartuinnaapput, sulilu illuaqqamut kialaartumut qaninnerpaamut km-it qulit ungasissuseraatit. Aqqutaani ingerlaaqatigisinnaasatit marluupput. Siulleq isornartorsiuinnaavissoq. Isikkanni qaattoorneq maalassutigileraangakku, oqaatsiminik saassutarisarpaatit: “Ilungersulaariarit. Sooruna nukilaatsigaat? Susutinuna?” Ingerkaqatigisinnaasavit aappaata inussiarnisaarluni tusarnaaginnartarpaatit. Imannallu qiimmassartarlutit: “Ilungersunarnera takusinnaalluarpara. Ilungersornerit ajunngeqaaq. Suut tamarmik iluatsissaqqaarput. Ingerlaannarit.”

Sorleq ingerlaqatigerusunnerussaviuk? Immaqa kingulleq? Qiimmassaasoq isumassuisorlu.

Oqaluttuaaqqap siunertaa tassaavoq qaqugukkulluunniit sumunnaraangatta ingiaqateqartarnerput paasissallugu. Amerlanerpaasugulli isornartorsiuisartoq ingiaqatiginerusarparput. Taamaattariaqanngikkaluarpoq. Isumaluttumik isornartorsiuisumillu ingiaqateqarnak kissalaamik paasinninnermillu tunniussisinnaasumik ingiaqateqarnissat sungiusarsinnaavat.

Tarnip pissusaanik immikkut ilisimasallit periuseq tamanna taaguteqartippaat – imminut isumassorneq. Naatsumik oqaatigalugu, ikinngutigilluakkavit pissusilersorfingisarneratut, imminut ikinngutigisutut pisalernissannut tunngassuteqarpoq.

Una takorluulaariaruk, ikinngutigilluinnakkavit oqaluttuuppaatit inuunermini annilaanganeq aliasunnermik anniaatinillu kinguneqartitsisoq ajoqutigiinnaavillugu. Ilungersulaaginnarnissaanik kaammattussaviuk? Immaqaluunniit suli ajornermik oqarfigissaviuk? Oqarlutit inuttut allatulli inuusariaqanngimmat taamatut nalaataqartoq? Soorunami taamaaliornavianngilatit. Tusarnaassagaluarputit, paasinnissagaluarputit immaqalu pakkutaarsimassagaluarlugu.

Taamatorpiarlu ilinnut pinissat aamma sungiusarsinnaavat, inuunernilu allanngortitsingaatsiarsinnaavoq. Minnerunngitsumik nangiarnarisannik suliaqartillutit annilaanganeq unammilleraagakku. Siumukariarnerni soorunami utersaarfeqartassuutit. Piffissat ilaanni ajunngittumik ingerlasassuutit.

Soorunami suna tamarmi oqittuinnaanngilaq. Piffissalli ilaanni uninngaannalersutut nakkariartulertutullu misigisassaatit. Ingerlaarfinni anguniakkat naammassiaartuaarnerani aqqummi kingullermi aqqutissatit sakkortunerussapput, tassanilu imminut kialaamik tuniorarnissaq isumassornissarlu pisariaqartinnerpaassavat. Annilaanganeq iperarniarukku sapiissuseqartariaqarputit, nukissaqartariqarputit naammagittartariaqarlutillu. Sakkussavit pissarsiarinissaannut pisariinnerpaassaaq imminut ikinngutitut piguit.

Taavami tamanna qanoq sungiusassaiviuk? Tigussaasunngortittariaqarpat. Periutsimi tunngavigineqartussaq pissarsiarereerpat. Imminullu aperissaatit: ”Ikinngutigilluagaq uattulli atugalik qanoq pissavara?” Taamaaliornerni paasilissavat ikinngutinnut pisarnerit ilinnullu pisarnerit assigiinngissuteqartut. Assersuutigalugu allat kukkusinnaasutut isigisarpatit. Kisianni illit kukkoqqusaanngilatit. Immaqaluunniit allat asanninnermik isumassuinermillu tunisinnaavatit, imminulli taamannak pisinnaanak.

Aallartinnissat ajornannginnerulersinniarlugu, annertunerusumik imminut isumassornissarnut sungiusaammik nassuiaatitalimmik suliaqarsimavugut. Taanna minutsinik aqqanilinnik sivisussuseqarpoq. Tamatuma saniatigut, pisariqartitatit tamarmik tassaapput akornusersorneqarnak sumiiffigisinnaasarnik pissarsinissat alapernaasingaatsiarnissallu.

Taamatut ingerlatsineq misilissimanngikkukku, eqqarsaaterpassuit takkussuussinnaapput, soorlu: “Fantangaarami. Misigissusileriniakujunnerungaaramilu.” Taamatut eqqarsalissagaluaruit modulit pingajuanni periutsit ilinniarnikuusavit ilaat eqqarsaatigikkit. Assersuutigalugu eqqissillutit imannak eqqarsarsinnaavutit:  “Massakkorpiaq periuseq fantattutut isigaara,” ilitsersuisullu nipaa ukkatariniarsareqqilerlugu. Qaratsanni isornartorsiuisartuutivit immaqa saassutarissavaatit, aamma nalinginnaasuuvoq. Tassami eqqarsartaatsit allanngorujussuartittussaagakku. Sapinngisat tamaat aqqutaani isornartorsiuisartuutit ingiaqatiginiarsarissavat. Inussiarnisaarfigalugu qungujulaffigalugulu. Immaqa imannak oqarsinnaavutit: “Isornartuillamalliaasiit. Kakkaak ukua kamannaringaarakkit. Kisianni misilinniarpara.”

Tassa imminut isumassorneq pillugu paasissutissiissutigerusutakka. Naggasiutigissavaralu: Videumi tulliuttumi sungiusaat ingerlalluariuk.