Sungiusaat nassuiaatitalik: Imminut isumassornerit annertusiguk

Maanna imminut tungiornemik allanillu tungiuinermik sungisarneq aallartissavarput.

Immaqa misilissimanngisaannarpat?

Eqqissiinnarit. Ajornanngitsunnguuvoq.

Sungiusarnerup immikkoortui tulleriiaarlugit ilitsersussavakkit.

Sungiusarneq minutsinik arlaqartunik sivisussuseqarpoq.

Taamaammat ilorrisimaarnartumik inissikkallaat. Issiasinnaavutit nalasinnaallutilluunniit.

Issiavimmi issianissaq toqqarukku isikkavit illuttut natermut toqqatinnissaat pitsaanerpaassaaq.

Assatit niunnut inississinnaavatit.

Qeratasutut misiginak sukasimanalluunniit qitit qerattarlugu issianiarsarigit.

Tuitit qasukkartikkit.

Sallaatsunnguamillu isitit matullugit.

Isitit matoqqatikkusunngikkukit aalajangersimasumik nakkussaqarnak siumut isigisaqarsinnaavutit.

Aallarniutitut marloriarlutit qinngakkut ilummut anersaarit, qanikkullu silammut itisuumik anersaarit.

Ilummut anersaarninni sakissavit neruttornerat maluginiaruk.

Puatit silaannarmik nutaamik immerneqartarput.

Silammullu anersaaraangavit timivit eqqissinerulaarnera maluginiaruk.

Tulliani silammut anersaarninni kigaatsunnguamik pisarnertut anersaartoqqilersinnaavutit.

Massakkut inuk nuannarisat eqqarsaatigiuk.

Assersuutigalgu ikinngutaasinnaavoq, ilaqutaq imaluunniit inuk alla ilinnut pingaarutilik.

Toqqakkavit kinaanera aalajangiisuunngilaq.

Eqqaaqqaakkannik toqqaaginnassaatit.

Inuk taanna takorloorniarsariuk.

Tamanna ajornakusoorpat, immaqa nipaa tusaasutut issinnaavat?

Tikka immaqa naasumasutut illugu. Allatulluunniit inuk taanna qanittutut illugu.

Qanoq iliornerit pingaarnerunngilaq.

Inuup taassuma ilinnut pitsaanerpaamik attaviginissaa taamaallaat pineqarpoq.

Inuup taassuma maluginerani imaluunniit takorloornerani nuannaarneq kissalaarnerluunniit takkunnersut maluginiaruk.

Maanna piffissaq qaangiutereersoq imaluunniit massakkut pisoq inuup taassuma ajornartorsiorfia imaluunniit piffissaq ajornartorsiorfigisimasaa eqqarsaatigiuk.

Assersuutigalugu nappaateqarneq, peeraqarnikkut aliasuuteqarneq allamilluunniit atugarliuuteqarneq.

Inuup taassuma anniaataasa iluaalliuutaasaluunniit ilinnik qanoq misigititsinerat maluginiaruk.

Illit immaqa ikiuerusunnerit arlaatigulluunniit iliuuseqarusunnerit maluginiaruk.

Misillillugu manna inummut eqqarsaatigisannut kissaatitit pitsaasut ingerlateqqikkit.

Qamuuna imminut ima oqarfigalutit taamaaliorsinnaavutit: Anniarunnaarittoq.

Eqqissigittoq nuannaalerlutillu.

Uummatinnit iluunngarlutit inuup taassuma nuannarisavit anniarunnaarnissaanik nuannaalernissaanillu kissateqarsinnaanerit paasiniaruk.

Oqaaseqatigiit uku uteqataakkit: Anniarunnaarittoq.

Eqqissigittoq nuannaalerillu.

Anniarunnaarittoq.

Eqqissigittoq nuannaalerillu.

Maannakkut piffissaq illilluunniit nammineq ajornartorsiorfittut misigisat eqqarsaatigiuk

Taanna tassaasinnaavoq kukkusutut imaluunniit imminut naleqartinnginnertut misigiffigisat.

Aamma imaassinnaavoq nuannarisannut aaqqiagiinngissuteqarfigisat.

Imaluunniit kissaatigisattut pisoqarfiunngitsoq.

Allanik pinnittarnitsinniit immitsinnut sakortunerusumik pigajuppugut.

Massakkorpiarli ikinngutigilluakkannik ilaquttanilluunniit nuannarisannik tungiuisarnittuut imminut tungiorsinnaanerit misilitsiaruk.

Taamaammat maanna oqaaseqatigiit ima allanngulaarpagut: Uangattaaq anniarunnaarlangatoq.

Uangattaaq eqqissillungalu nuannaalerlangatoq.

Meerannguugallarnerit takorlooruk.

Imminut tungiornissaq immaqa ajornannginnerulissaaq.

Immaqa marlunnik ukioqarlutit – nuannaarlutit, tatiginnillutit sanngiiffeqarlutillu.

Immaqa ajornannginnerussappat ukiutit eqqaamasatit Takorloorsinnaavatit.

Taamani meeraaninni imminut tungiorneq immaqa malugisinnaavat?

Tulliuttumi minutsip missaani oqaaseqatigiit uku uteqattaakkit.

Uangattaaq anniarunnaarlangatoq.

Uangattaaq eqqissillungalu nuannaalerlangatoq.

Uangattaaq anniarunnaarlangatoq.

Uangattaaq eqqissillungalu nuannaalerlangatoq.

Oqaatsini kissaatigisaq sapinngisat tamaat maluginiaruk.

Illit – inuttut allatulli – nuannaarnermik, eqqissinermik pitsaasumillu inuuneqarnissamik kissaateqarnerit.

Uangattaaq anniarunnaarlangatoq.

Uangattaaq eqqissillungalu nuannaalerlangatoq.

Maanna timivit qanoq misinnarnera maluginiaruk.

Imminut allanillu tungiuineq timikkut immaqa malugisinnaavat?

Immaqa sakissavit uumativilluunniit nalaa kissattutut aqilisutulluunniit misigaat?

Immaqa oqinnerusutut nuannaartutullu misigaatit?

Immaqaluunniit malugisaqanngivipputit. Tamanna aamma ajunngilluinnarpoq. Tassaaginnarporlu malugisat.

Oqaatigineqareersutut imminut tungiornissaq ajornartorsiutigigukku tamanna nalinginnaalluinnarpoq.

Eqqarsaatitit imminnut isornartorsiuisut immaqa qaffakaassapput.

Immaqa taama sungiusarneq soqutaanngitsutut eqqarsaatigissavat.

Immaqa eqqarsarputit nukittujuaannassallutit, kukkunngisaannassallutillu.

Immaqa eqqarsarputit allatuulli tungiorneqassanngitsutit.

Immaqa eqqarsarputit inunnut allanut naleqqiullutit maleruagassat allaanerusut.

Aamma taamannak eqqarsartuni kisimiinngilatit. Inuit tamarmik kukkusarput.

Tamatta kukkusarpugut.

Tamatta iluatitsinngitsoortarpugut.

Tamanna inuunerup ilariinnarpaa. Ajunngilaq.

Qujanartumik imminut allanillu tungiuineq sungiusarsinnaavat.

Allatuulli ilikkagassaannaavoq. Soorlu titartaasalerneq, naluttalerneq allalluunniit.

Taamaammat aamma una sungiusarneq nangiqeqqunarpoq.

Sungiusartarnerit amerliartortillugit iluaqutaanerujartussaaq ajornannginnerujartussallunilu.“

Piffissap ingerlanerani eqqarsaatit oqimaatsut oqilinerat misigissajunnarsivat.

Tungiuinissavit ajornannginnerulernera – imminut allanullu.

Inuillu tamatta kukkusarnerput paasillugu.

Tamatumalu ajunngilluinnarnera.

Maanna sungiusarnerup naammassinissaanut piareersarnialissaatit.

Avatangiisinni nipit maluginiakkit.

Issiaviit innanngaffigisalluunniit maluginiaruk.

Piareeruillu sequnngingasimaguillu kigaatsunnguamik uikkiartorit.

Tullisaanut ingerlatinnak imminut piffissalitsiarit.

Imminut allanillu tungiuinermik misigisimanerpit ulloq naallugu attassinnaanera misiliguk.

Qujanaq tusarnaaravit.