Imminut isumassorneq: ikinngutitsialattut imminut pinissat ilinniaruk

‘Ilinniagassakka isumagisariaqaraluarpakka … sungiusarnerusariaqaraluarpunga … … taamaatittariaqaraluarpara’ Eqqarsaatit taamaattut ilisaraagit? Immaqa eqqarsaatinni. Imminut isumassorneq tassaavoq piumasaqaatit annikillillugit nuannaalersitsisartunik suliaqarneq. Maanna qanoq ilillutit imminut isumassornissannut arfineq marlunnik isumassarsitinneqassaatit

(Illit isummat naapertorlugu) isumagisassarpassuaqaraluarputit. Piumasaqaatit annertoqaat:

  • Ilinniakkat.
  • Suliffiit.
  • Ikinngutit. Timersorneq. Festerneq …

Ilaannilu suut tamarmik ajalusoortarput. Piumasaqaatinik eqquutitsinngitsutut misigaatit– tassanngaannarlu niaqqunni nipi isornartorsiuisoq tutsiuppoq, suut tamarmik ajorluinnarnerat pillugu ilinnut avoqqaarliuterpassuarnik ulikkaartoq. Suut saperluinnaritit imal. eqquutsinngikkitit!

Ilunni ingasaassiniaq unitsiguk!

Taamaattariaqanngivippoq. Soorlu naamerluinnaqqissaaq!

Taamaaliorsinnaavutit – naagga, taamaaliussaatit! – Annertunerujussuarmik imminut isumassornissamik ilinniarneq. Iluamik eqquutsinngitsorisannik imminut avoqqaariuarnermut taarsiullugu, ilunni isornartorsiuisoq unitsissavat. Ingasaassiniaq ilunniittoq. Tamatumunnga taarsiullugu imminut ima oqarfigigit:

  • “Inuit tamarmik kukkusarput, soorunami uanga aamma kukkusinnaavunga”
  • “Kukkunngisaannartoqanngilaq”
  • “Uanga aamma asaneqartussaavunga”

Soorlu taamatut. Ilinnut iluaqutaappat iluarusuutigigukkulu naammaqaaq.

Ulluinnarni qanoq ilillutit imminut nuannaarnerulersissinnaanerit pillugu siunnersuutinik allanik perusuppit? Takanna. Aaku qanoq aallartinnissannut isumassarsiat pitsaasut arfineq marluk.

Qanoq ilillutit imminut isumassornerusinnaaninnut isumassarsiat arfineq marluk

1. Imminut isumassornerunissamut, maanna inuunermut akuersaarneq qulequtsiullugu sungiusaat nassuiaatitalik misiliguk

Buddhist-it ukiuni tuusintilikkaani ilisimavaat: Imminut isumassorneq allanillu isumassuineq sungiusarsinnaavatit. Soorlu titartaanermik, nalunnermik imal. qarasaasiakkut programmiliorsinnaanermik sungiusarsinnaanertorluinnaq.

Maanna inuunermut akuersaarneq qulequtsiullugu sungiusarnissamut ilitsersuut ajornanngitsoq aanaa. Tassani piumasaqaatituaapput:

  1. Sumiiffimmi eqqissinartumiinnissaq akornusersorneqannginnissarlu
  2. Minutsit aqqanillit
  3. Aap…tassa taakkuinnaapput.

 

2. Imminut ikinngutitsialaaneq

Ajortippat. Kukkusarputit sianiilliortarlutillu … ilaannikkut! Inuulluni taamaappoq. Arlaannarpuluunniit kakkattorsuunngilaq. Immaqali kukkunimininnguugaluit ukkattuartarpatit. Uteqattaarlugit.

Tamatumunnga taarsiullugit marlussunnik kingumut alloriarit: Imminut qimerloorit, soorlu ikinngutiginerpaasat isigigit. Ikinngutiginerpaasat taamatulli atugaqartoq qanoq pisarpiuk? Ikingutiginerpaasat sianiillioqqammersoq iluatsitsinngitsoortorlu? Sianiitsorsuunerassaviuk pillartarialik?

Ilaa naamik? Ima oqassajunnarsivutit: “Soqutaanngilaq!” Imal.: “Hey, aamma taama ajortiginngilaq …” Ilinniutigiuk! Ikinngutigilluakkannut iliuuserisattulli imminut iliuuseqarfigineq sungiusaruk!

3.  Naleqqutinngitsumik imminut piumaffigineq annikillijuk

Piviusorsiunngitsunik imminut piumaffigisarpit? Imal. naatsorsuutigisanik annertuunik, qaffasissumik pitsaassuseqarnissamik imminut piumaffiginermik suliassarpassuarnillu annikillisaanissat pisariaqartippiuk?

Torraaqaaq naammassisaqarusukkavit. Sorpassuit suliarisarpatit. Eqqaamalaarulli ulloq unnuarlu nal. ak 24-iinnarnik sivisussuqarmat. Imminummi ullormut qanoq annertutigisumik suliakkersinnaanerit pinngitsoornani killissaqarpoq … nuannaartutut naammagisimaarinnittutullu misigiuassaguit! Ilaatigut pisariaqartarpoq imminut ima oqarfiginissaq: “Aap, iliuuseqarfigisariaqarunaraluarpara … Ajornaqaarli.”

4. Nuannaarutigisartakkannik sammisaqarit

Inuuneq pisussaaffippassuarnik ulikkaarpoq. Pinngitsoornak isumagisassannik – ass. atuarfik. Atuassaatit! Tassa. Taamaappoq- tamatsinnut.

Inuunerpit tamarmi pisussaaffiinnarnik ukkassiviunnginnissaa pingaaruteqarpoq. Taamaakkuit ataatsimut isiginnissinnaajunnaassaatit, ilunnilu nukissannik naatsorsuut sippuissalluni. Soorlu bankimi konto-mi naatsorsuutinni nukissatut isertut anisullu oqimaaqatigiilluartariaqartut. Taamatuttaaq bankimi kontonni atuivallaarneq torinngimmat, nukissat kontoanni tamanna ajorluinnarpoq. Amigartuussaatit. Inuunerliulerlutit. Nikallorlutit.

Taamaammat nukissannik katersilluartarit. Ulluinnatit immersukkit – nuannaalersitsisunik nukissanitsitsisunillu. Immersorit. Aap, ajornanngippat ulluinnarni ajunngitsorpassuit qanoq ilillutit inissarsisinnaanissaannut pilersaarusiorit. Ullorsiutinnut mobilinnulluunniit allakkit – pilersaarutigisartakkattut allatulli.

5. Naaggaarnissat sungiusaruk

Ukiut tuusintilikkaat siuliini cheesy pophit-eqarpoq taaguutilimmik “Ajuusaarpunga, oqaaseq ajornarnerpaarpasippoq”. Ima taaguuteqarsimassagaluarami “Naagga, oqaaseq ajornarnerpaarpasippoq”. Arlalippassuuvugut naaggaarsinnaanermik ajornartorsiutillit. akuerserusunnerusarpugut. Taamaalilluta qalleraannginnalersarluta – tatisimaneqalernissarput, qasusoornissarput immaqaluunniit ilungersualernissarput/stress tikillugu.

Amerlasuut naaggaarnissaq ajornartorsiutigaat. Taamaammallu amerlavallaanik imminnut suliakkertarput uffa kajungerinngisaminnik imal. nukissaqarfiginngisaminnik. Aperisoqaraangat sikisaannartarput akuersillutillu: Koncertimut ilaarusuppit? Uuminnga ikiulaarsinnaavinga? Pigaartooqqissinnaavit?

Naagaarnissaq ajornakusoorpoq.

Immaqa ikiuukkusuinnarputit.

Immaqa periarfissamik asuliinnartitsineq nuannarinngilat.

`Naagaaruit` immaqa allat qanoq qisuariarnissaat siooragaat.

Imminulli salliukkunnaarlutit tunulliuttualeruit nungullarsalissaatit! Naggataagut immaqa nukissaaleqilissaatit assullu isumalulerlutit.

Taamaammat naaggaarnissannut sapiissuseqalerit nukissaqalerillu. Immaqa ilimagisanniit taama navianartiginngilaq. Eqqaamajullu – sungiusarneq pissartanngortitsisarmat! Aallaqqaammut naaggaartaleruit killissatillu sumiinnersut maluginiarlugit, taava tamanna ilinnut ullut tamaasa oqiliallaataassaaq.

6. Imminut qasuersaarfissigit – ajornanngippat ullut tamaasa

Ilisaraajuk ullut sukkalluinnarlutik qaangiussornerat?

Wrooom.

Taavaana ulloq naasoq. Taava sap. akunnera … suut tamarmik sukkalluinnartumik ingerlapput. Ilaatigut ima sukkatigisarput, allaat qanoq innerit maluginngitsoortarlugu. Ingerlarsuinnarputit.

Unilaarit!

Qasuersilaarit. Unitsiarit, qanoq innerillu malugalugu. Annertoorujussuusariaqanngilaq, minutsit marlussuinnaat, imminut maluginialaarit. Tamakkiisumik sunniuteqarsinnaavoq. Immaqa aamma suli eqqissinerunissannut sungiusarneq: Timip immikkoortukkuutaarlugu qasukkartikkiartuaarnissaa , timinni sukasimasut qasukkartinniarlugit sungiusarneq misiliguk.

 

7. Tuikkut imminut pattalaarit – akulikitsunik!

Mianersorit: Qaratsavit illit nammineq kukkussutitit eqqarsaatillu nuanniitsut annertoorujussuanngortittarpai! Akerlianik suut pitsaasut iluatsitatillu tamarmik annikillerujussuartarput.

Amerlaqisunut taamaappoq!

Iluanngilaq.

Qujanartumik qaratsap sulinera paasilertoruminarmat aaqqiissutissaq ajornanngitsunnguuvoq: Ukkassatit annertusiartortarput! Tassalu iluatsittakkavit maluginiarnerunissaannut imminut ilinniartissaatit. Suliatit ajunngitsut tamaasa. Annertuujusariaqanngillallu – annikitsunnguilluunniit ulluinnarni iluatsittut imal. nuannersut imal. kusanartut.

Eqqarsarit, imal. nipituumik imminut isumakkeerrinnittumik oqarit ass.: “Aap, kukkusarpunga … pitsassuarnilli kammaqarpunga!” – imal.: “Aap, isikkamik arsaannermut pikkorissorsuunngilanga … guitarersinnaavungali banankagimillu mamarnerpaamik sanasinnaallunga” (taamaqataanilluunniit, pikkoriffigisorisannik).

Inunnut amerlasuunut suut pitsaasut takunissaat aalajangiusimanissaallu ajornakusooqaaq. Taama misigiguit taava misiliguk ullut tamaasa imminut allanulluunniit ajunngitsumik iliornerit ataaseq allattarlugu. Immaqa innartinnak ullorsiutinnut imal. mobilinnut. Taamaaliornikkut qaratsat iluatsitannik tamanik takunnissinnaanngorlugu sungiussitikkiartuaassavat. Taamaaliornikkut imminut tatigilissaatit– nunannaarnerulerlutillu.

Aallartigit. Allannguiniarneq sivisusarpoq.

Soorunami unnuaannarmut suut tamarmik allanngornissaannik neriorsorsinnaanngilatsigit! Imminut qajassuuppallaartarsimanngikkuit, allatut iliornissap ilinniarnissaa sivisussaaq.

Taamaammat isumassarsiassatut tunniussagut arfineq marluk pissarsiarigaluarlugit – ilaanni periutsitoqqannut utersaarneq immaqa misigisarsinnaavat. Tamanna pissusissamisoorluinnarpoq: Ileqqunik allannguiniarneq naammagittarnermik piumasaqaatitaqarpoq. Siumut alloruit … tassanngaannaq kingumut marlunnik allorneq arlaleriarlutit misigissajunnarsivat! Iluanngilluinnarpoq.

Eqqaamaannaruk, tuusintilippassuit allallu tuusintilippassuit illit sioqqullutit taamatorpiaq sorsutaqarsimanerat. Taakkulu ilarpassui naggataagut oqiliallallutillu inuunerinnerulerput! Imminut paarinerunissaq ilikkarsimavaat. Imminut isumassornerunissaq. Illit aamma taamaaliorsinnaavutit.