Imarisaanut uteqqigit

Modul 6: Lektioni 1

Annilaanganeq ataasiakkaaralutit imatut unammillersinnaavat

Lektionip tullia

Opret bruger

Siuariartornermut kaammattuutinik nassitsittarusukkuit atuisutut atit pilersinneqarnerani nalunaarutinik nassitsittarnissat qinersinnaavat.

Suliassaq

Annilaanganeq majuartarfilioruk

  1. Maanna annilaangermut majuartarfiliorneq misilissavat. Arlaannik massakkorpiaq annilaanganerup akornusiineranik patsiseqartumik pisinnaanngisannik toqqaanikkut taamaaliussaatit. Taava qanoq ilillutit anguniakkavit alloriarnernut annikitsunut agguarsinnaanissaa eqqarsaatigissavat.

    Annilaanganerup majuartarfiata tummeraani siullermi anguniakkavit tungaanukarniarlutit alloriarneq annikinnerpaaq allassavat. Tummeqqanut qulaaniittunut unammilligassat annertusiartuaartillugit allassavatit.

    Qimmit ersigigukkit taamammallu ikinngutit qimusseqatigisinnaannginnerat assersuutaasinnaavoq. Majuartarfiup tummeraa alloriarfissat siulleq tassaasinnaavoq qimmit pillugit videolianik isiginnaarneq. Taava isiginnaakkatit aarlerititsiunnaarpata alloriaqqissinnaanngussaatit. Alloriarnerup tullerisinnaavaa ikinngutigilluakkap qimmiata pituutallip eqqaaniinneq.

     

    Sammisassaq 16: Annilaanganermut majuartarfiliorit

     

    …..pisinnaalernissaa anguniarpara

     

    Alloriarneq 1.

    Alloriarneq 2.

    Alloriarneq 3.

    Alloriarneq 4.

    Alloriarneq 5.

    Alloriarneq 6.

    Alloriarneq 7.

    Alloriarneq 8.

     

    Anguniakkannut alloriarnerit amerlinissaat pisariaqartikkukku, majuartarfik talliinnaassavat.

    Piareeruillu anguniakkavit angunissaanut ataasiakkaarlugit alloriartarnerit aallartissinnaavatit.

    Inuk iluarisat peqatigalugu taamaalioruit iluarnerussaaq.

Haluukkut. Modulillu arfernannut naggataannullu tikilluarit.

Annilaanganeq pillugu paasisaqareerputit. Eqqarsaatit misigissutsillu nuanniittut aqutsinnginnissaannut periutsinik sungiusarsimalerputit. Ataatsimut isiginnissinnaaneq naleqartitallu suunerinik paasinnissinnaaneq aamma eqqarsaatigereersimalerpatit.

Modulimilu matumani ersigisavit annilaangagisavillu unammillernissaannut periuserisinnaasat saqqummiutissavara. Tarnip pissusaanik immikkut ilisimasallit periuseq una sunnertinnermik taasarpaat, taannalu naatsumik oqaatigalugu annertusiartuaartumik ersigisannik periuseqarneruvoq.

Kikkulluunniit sunnertinnermik ingerlataqarsinnaapput, uanili pingaaruteqartorujussuuvoq arriitsumik ingerlanissaq. Pisinnaasatit aallaaviusariaqarput. Kisimiillutit ingerlatsisinnaavutit toqqissisimanarisalluunniit peqatigisinnaavat.

Qanorluunniit ilioraluaruit periutsip tamatuma tunngavigisaasa ilisimanissaat pingaaruteqarpoq. Tulleriiaarneri takulaartigit. Siullermik annilaanganngikkaluaruit angorusutaraluatit eqqarsaatigissavatit. Imaassinnaavoq ikinngutit qimusseqatigerusukkaluarit. Qimminulli ersitunerit inituallaarmat qimusserusunngilatit. Tullertut imminut aperissaatit: “Qimminut ersigisaqarunnaarnissannut alloriarneq annikinnerpaarpaaq suua?” Imaassinnaavoq peqateqarlutit nittartakkatigut qimmit assiinik isiginnaartutit. Assinik isiginnaaqattaareeruit, toqqissisimanarilereerukkulu imaassinnaavoq, qimmeqarfimmukarsinnaasutit ungasianiillu qimmit isiginnaarsinnaagitit. Piffissaq ingerlareerpat immaqa qimmiaqqanik angalaannartunik attugaqarsinnaanngussaatit – nuannarinavianngilat ilunnilu paarsisut nilliassagaluarpoq: “Naamik, naamik naamik! Taamaaliornak. Uterit!” Periutsimi uani ikinngutivit qimusseqatiginissaanut anguniakkannut, aqqutissat annikittualunngorlugu aggorpat, taamaalilluni anguneqarsinnaanngorluni. Anguniakkavit angunissaata tungaanut taamaaliorsinnaavutit.

Annilaanganerup taamatut unammillernerani ersissutit piviusumi qanoq innersut takuneqarsinnaapput. Imaassinnaavoq qimmit tamarmik ulorianartuunerat takorloortarit. Alloriaqattaarninnilu paasilerpat ersinerit qimminut tamanut atuutinngitsoq. Immaqa sunaaffa qimmimik pattalaarineq takorluukkattut ajortiginngitsoq. Paasiartulerpallu eqqarsaatitit takorluukkatillu tamarmik upperisariaqanngikkitit ingattajaartuusinnaasullu. Paasiartuaarnerani imminut upperineruleriartussaatit, paasiartulerlugulu eqqarsaatitit misigissutsitillu aqutsisariaqanngitsut, annilaanngatigisartakkallu unammillernissaanut nukissaqarlutit.

Tulleriiaarerujoornikkut inuunerit nammineq aquleriartorsinnaavat. Soorunami annilaanganerit imaaliallaannaq peernavianngilaq. Taamak pisariitsiginngilaq. Alloriarnerit tamaasa annilaanganeq takkuttassaaq. Unammilleqattaarneranili nukkakkiartulissaatit, iperariartulissallugulu.

Maannalu una apeqqutaaginnalerpoq: Angorusutat anguniarlugu alloriarneq minnerpaarpaaq ullumikkut sapaatip akunneraniluunniit matumani tigusinnaasat suua? Aallartinnissarnut ikiorniarlutit, videup matuma suliassartaa ammarsinnaavat, imminullu annilaanganerup akiornissaanut alloriarfissannik ilitsersuusiorlutit. Angorusutannik annilaanganerulli piviusunngortissinnaanngisaannik nassaassaatit. Eqqarsaatigiullu angorusutat anguniarukku, alloriarnissatit qanoq isikkoqassanersut. Annilaanganeq anigorniarlugu alloriarfissannut nalunaarsuiffissanni alloriarfigisinnaasat minnerpaarpaaq allassavat. Alloriarfissanni tulliuttuni alloriarfissat unammillernarsiartuaassapput. Naammassiguit annilaanganinnut unammillernissannut pilersaaruteqalissuaatit. Aallartinniarnera sakkortulaarsinnaavoq.

Taamaattumik inuk toqqissisimaffigisat peqatigalugu alloriarfissatit suliarisinnaavatit. Annilaanganerummi anigorniarnera kisermaattariaqanngilat.

Tassalu ullumikkut allattaavinni nalunaarsukkakka tamarmik. Neriuppunga saqqummiussanni eqqaamasat tassaasoq annikitsumik alloriarnissaq. Pingaaruteqaqimmammi. Alloriarfissannik suliaqarluarnissannik kissaappakkit. Alloriarluarnissannillu kissaallutit.