Haluukkut,
Piniartup oqaluttuaanut uunga assingusumik tusarnikuusimassaatit, immaqaluunniit illit nammineq piniartillutit misigisimavat. Tuttut arlallit qaqqami neripput piniartullu taqissorluni qanillattorpai. Piniartup tuttut arlaat aallaallugu pisarinissaata tungaanut suna tamarmi nipaappoq. Tuttoqatai qimarrapput, qaqqasunnalli tunuanut immaqa meterit 100-it missaannik ungasissusilimmut qimaapput. Unippullu tupinnaannartumillu eqqissilertorput inuunertik neriniarnertillu nangeqqillugu, soorlu susoqarsimanngitsoq.
Takorluulaariaruk illit ikinngutinnik arlalinnik peqateqarlutit taama nalaataqartutit. Tamatuma kingorna sivisuumik siooranermik eqqugaassasutit eqqoriarpara. Soormitaavaana uagut inuit tuttullu taama assigiinngitsigisumik qisuariartartugut?
Videumi uani tamanna paasisassarsiorfigissavarput. Akissutaatami annilaanganermut tunngasumik pingaarutilimmik oqaluttuutissavaatigut.
Tuttu aallarniutigissavarput. Navianartorsiorluni paasiniariaruniuk, uumasup qarasaani kalerrisaarilertarpoq: ”Mianersorit, mianersorit. Inuunerit annaanniaruk.” Tuttulu navianartumit aniguippat, sivitsunngitsoq kalerrisaarut qamissaaq, suullu tamarmik pisarnertut ingerlaqqissapput. Allatut oqaatigalugu uumasoq sisamanik niulik, massakkorpiaq pisoq kisiat eqqarsaatigalugu inuuvoq.
Inunnili taamaanngilaq. Uagummi qarasarput iluaqutsiullugu pereersut pisussallu eqqasaatigisinnaavagut. Siunissami qanoq pisoqarnissaa takorloorsinnavarput, pisimasullu eqqaamasinnaallugit. Tamanna tupinnaannartunik periarfissiivoq. Ass. eqqarsaatigilaariakkit isumassarsiarpassuit eqqarsarsinnaanngikkaanni piviusunngorsinnaanavianngitsut, ”Imannammi pisoqassagaluarpat?” Takorluuisinnaassuserpulli ernummassutit siooranerullu inuunitsinni initoorujussuanngorsinnaanerannik kinguneqarsinnaavoq. Uagummi tuttumit allaassuterput tassaavoq eqqarsarsinnaaneq ”Arraa, piniartoq utissappat qanoq iliussaanga?” Imaluunniit: ”Puuuh, alaa. Alaatsinaalluannginnamami aamma sianiippunga.”
Tamatuma kingunerisaanik tuttumit akerliusumik sillimajuartunngorsinnaavugut. Qasseriarluta ernumalluta pisoqarsinnaaneranik eqqarsaraluarutta, tamatigut allat ernummatissat inissaqartuassapput. Immaqa ilaatigut ima eqqarsarsinnaavutit ”Niaqqunni nipiliornermut nipikillisaateqassagaluarami.” Ajoraluartumilli taamaattumik nipikillisaateqanngilaq. Inuttut inuunerup ilagaa eqqarsaatinik anniartitsiuartumik qarasaqarneq. Tamakku ilaatigut ikiuukkusuttarput. Ilaatigut eqqumiittarput. Ilaatigullu siooranartarput imaluunniit aarlerisitsisarlutik.
Taamaammat ernumassutit inuuninni inituallaarpata, silaarutilernermut allamulluunniit ersiutaannginnerisa ilisimanissaa pingaaruteqarpoq. Ernumassuteqarneq tassaaginnarpoq assigiinngitsorpassuartigut tupinnaannartumik qarasaqarnitta akissaata ilaat.
Tarnip pissusaanik ilisimasallit aperigukkit suna pillugu uagut inuit ernumasinnaanngortitaasugut, akissutaat paasilertoruminarpoq: Taassuma inuttut aniguinitsinnut ikiorpaatigut. Aniguisinnaanissamit isigalugu navianartunik ajornartorsiutinillu arajutsiinnarnani ingasattajaartumik ukkassineq torrallataanerujussuuvoq. Siuligut nunarsuarmi timikkut siooranartorpassualimmi inuupput. Orpikkat akornanni siorsuppalaamik tusaagaanni uloriananngitsuuneranik eqqarsarnermiit, pinngitsoorani navianarsinnaaneranik eqqarsarneq torrallataanerujussuuvoq.
Qujanartumik qaratsatta oqaluttuai tamaasa upperisariaqanngilagut. Kingusinnerusukkut, periutsit eqqarsaatit oqimaatsut aqutsisinnaanerat ajornarnerulersillugu kingumut alloriarnissannut iluaqutissatit ilinniassavatit. Sulilu kingusinnerusukkut, qanoq ilillutit takorluukkat ernumanartut siooragisatit kigaatsumik aallartillugit piviusuunersut paasiniarnissaat misilissavarput. Taamaalioruit, pinngitsoornak takorluukkavit ingasattaajaartuunerat paasissavat.
Siullermilli akeqqatut avataaneersutut akiornerani annilaanganerup sakkortusisarnera videuni tulliuttuni marlunni takoqqaassavarput. Qimarratigigaannilu qanoq ililluni inuunitsinnik qumartitsisarnera. Tamatuma kingorna, tamatumunnga taarsiullugu pitsaasumik qanoq iliortoqarsinnaanera tikissavarput.
Videup tulliani, angut tamakkingajalluni sioqqanik matoorsimasumik aallarniuteqartumi takussaagut.
