ACT

Qarasaasiakkut maanna malinnaaffigisat, tarnip pissusaanik immikkut ilisimasalittut periutsimik ACT-mik taaguutilimmik tunngaveqarpoq.

ACT: Acceptance and Commitment Therapy

Oqaatsilli taakku sunik imaqarpat?

Acceptance = Akuersaarneq

‘Acceptance’ tassaavoq akuersaarneq, eqqarsaatit, misigissutsit timikkullu malugisat – uagut nammineq aqutarinngisatsinnik- takkuttarlutillu peeruttarnerat. Ilaanni iluarinartarput ilaannili iluarinassanatik … ilaanneeriarlutillu iluarinaratillu iluaaginassanatik.

Oqaaseq ’akuersaarneq’ tulluanngitsutut nipeqarsinnaavoq. Tassa soorlu kigutit kiiginnarnissaannut tunngasoq. Imal. ilungersuummerluni ilaatigut”allatut ajornaqaaq akueriinnartariaqarpat,” oqartoqarsinnaasarluni.

Erseqqissartigu: Akuersaarnermi matumani taanna pineqanngilluinnarmat. Akerlianilli akuersaarneq; eqqarsaatinut, misigissutsinut timikkullu malugisanut, piffissamiit piffissamut inissaqartitsinissap sungiusarnissaanut tunngassuteqarluni. Aqunniarsarinagit, sorsunniarnagit ingalassimaniarnagilluunniit.

Taakku qarasaasiakkut ingerlatsininni siullertut pingaarnertullu modilit aappaanni pingajuannilu sungiusassavatit.

Commitment = Pimoorussineq

Acceptance and Commitment Therapy-mi (ACT) oqaaseq commitment nutserneqarsinnaavoq ‘pimoorussineq’ imal. ’pisussaaffik ’. Naatsumik oqaatigalugu suut inuuninnik aqutsisuutinnissaannut tunngassuteqarpoq. Annilaanganerussava – imal. tassaassappat qamuuna pingaarnerutitatit? Tassalu naleqartitatit.

Immaqa oqaaseq ’naleqartitat’ eqqarsaatigilluagaanngitsutut imal. timitaqanngitsutut isumaqarfigaat. Ikittunnguuppullumi imaaliallaannaq naleqartitaminnik pingaarnerpaanik ajornanngitsumik taaguisinnaasut.

Eqqiisiinnarit. Massakkorpiaq tamanna ernumassutigisariaqanngilluinnarpat. Modulimmi tallimaanni annertunerujussuarmik paasisaqarfigisassatit tassaapput:

  • Naleqartitat suunersut.
  • Naleqartitat ilinnut immikkut pingaaruteqartut qanoq nanisinnaanissaat.
  • Illit nammineq inuttut naleqartitavit ulluinnarni ”pujorsiutitut” qanoq atorsinnaanissaat.

Qamani ilorpianni pingaartitavit naleqartitavillu nassaarinissaasa ilinnut pingaaruteqarneranut patsisaasoq tassaavoq annilaanganerup uteriiserfiginissaanut imminut nukissaqalerlutillu sapiissuseqalersinnissat.

Naleqartitat annilaanganerup takkunnissaanut nukittorsassavaatsit

Assersuusioriarta. takorlooriaruk ikinnguteqarnerup ilinnut naleqartitatut pingaaruteqarnerata paasinera. Tamatumalu peqatigisaanik ikinngutinnik ilaqassaguit bussernissavit pisariallip annilaangaginera.

Massakkorpiaq annilaanganaversaarneq immaqa eqqarsaatinnik tamanik tiguaavoq. Iluaaqimmat tamanna pissusissamisoorluinnarpoq. Tammaattoqartillugu ataatsimut isiginnissinnaaneq inuuninnilu suut pingaaruteqarnerannik imminut eqqaasissinnaaneq pitsaasuuvoq. Piffissap ingerlanerani periataartarnerit maliinnarlugu ima eqqarsarnak ‘bussernaveersaassaanga’, ima eqqarsarsinnaalissaatit: ‘bussernissara nakerinngilluinnarpara, ikinngutimali ilaginissaat annilaanganaveersaarnermiit uannut pingaarnerummat taamaaliorusuppunga’.

Oqaatigineqareersutut tamakkununnga tunngasut, modulit tallimaanni naleqartitanut tunngasumi, annertunerujussuarmik tusagaqarfigissavatit.

Maannalu ATC-p naalisarnerani T nallerparput – taannalu naatsuaqqamik nassuiaatissartaqarpoq. Taanna isumaqarpoq ’katsorsaaneq ’ (terapi).

ACT-mit ilinniarsinnaasatit pingaarutillit pingasut

Taamaammat ACT tassaavoq katsorsaariaaseq minnerpaamik pingasunik ilinniarfissat:

  1. Siullermik annilaanganerup nutaamik isummerfiginissaa ilinniassavat– tassalu sorsunnagu qimarratiginaguluunniit akuerinissaa.
  2. Aappaattut ATC ilinnut pingaarutillit qamaniittut-tassalu naleqartitavit nassaarinissaannut iluaqutaassaaq.
  3. Pingajuattut annilaanganermut taarsiullugu inuunerit naleqartitannit aqunneqaleriartussaaq. Tassalu annilaanganeq ingiallortigalugu … qanorli inuunissannik aqutsisinnagu aalajangiisuutinnagulu.

ACT = Rasmus Killormooq

Rasmus Killormooq nalunngiliuk? Tassalu allat oqaatigisaasa akerlerluinnaanik oqaaseqarajuttoq, pissutsit qanoq innerannik takorluukkatsinnik unammilliisartoq. ACT, Rasmus killormuutut ipajaarpoq.

Immaqa eqqarsarputit: “Annilaanganeq tassaavoq uanga inuuninni ajornartorsiutaasoq”. ACT -li akerlianik annilaanganeq nammineq ajornartorsiutaanngitsoq oqarpoq. Qanoq inuuneqarnissannik aqutsisunngortikkukku ajornartorsiutinngussaaq.

Immaqa eqqarsarputit: “Nammineq inuunera aallartissinnaassagukku annilaangajunnaartariaqarpunga,”. ACT -lli akerlianik annilaanganeq peqatigalugu inuulertariqartutit oqaatigaa.

Immaqa ima eqqarsarputit: “Annilaanganerup akiorniarnissaa aaqqiissutaavoq”. ACT-ili naapertorlugu tamatuminnga annertunerulersitsiinnarajuppoq.

Eqqarsaatit taamaattut unammillernarsinnaanerat paasilluarsinnaavarput. Ilaannikkulli nutaanik ilikkarniarluni allatullu isiginninniarluni, killormut saatitsinissaq pisariaqartittarparput.

Tamaammat ACT qarasaasiakkullu ingerlatsineq periarfississagitit neriuutigaarput.

ACT annertunerusumik paasisaqarfigerusuppiuk?

“ACT” ujaasiffigigukku; videot, atuakkat, tusarnaagassiat allaaserisallu arlalissuit takkutissapput.

Tuluttuujunera ajorinngikkukku,  “Your ACT Auntie”,  Youtube-imi videonik annikitsunik, annilaanganerit atussaanerulersillugu ACT-mi periutsit ilinnut qanoq iluaqutaasinnaanerannik nassuiaasunik pitsaasumik kanaleqarpoq.

Tarnip pissusaanik immikkut ilisimasalinnik ACT-mik immikkut ilisimasalinnik annilaanganaermullu katsorsaasartunik aamma peqarpoq