Imarisaanut uteqqigit

Modul 3: Lektioni 4

Eqqarsaatinut misigissutsinullu oqimaatsunut inuttaliuussigit

Lektionip tullia

Opret bruger

Siuariartornermut kaammattuutinik nassitsittarusukkuit atuisutut atit pilersinneqarnerani nalunaarutinik nassitsittarnissat qinersinnaavat.

Suliassaq

Eqqarsaatinut misigissutsinullu oqimaatsunut inuttaliigit

  1. Ernumatooq Pipa, Nakkarsaasartoq Minik, Ajorinninniartartoq Kaalat. Inuttaliinikkut eqqarsaatinik misigissutsinillu oqimaatsunik inissaqartitsinissap ajornannginnerunerulersarnera, amerlasuunit misigineqartarpoq.

    Tamanna maanna misilissavat. Siullermik eqqarsaatit, misigissutsit imal. misigisimanerit suut inuttarititannit takutinneqarnissaat paasiniaruk. Taakku tassaasinnaapput annilaanganeq, ernumaneq, ugguarneq imal.  neriuuteqannginneq.

    Taava inuttaliussat nassuiaruk. Ataani apeqqutit isumassarsivigisinnaavatit.

     

    Sammisassaq 9: Eqqarsaatinut misigissutsinullu oqimaatsunut inuttaliigit

    Apeqqutit uku atorlugit eqqarsaatitit nassuiakkit:

    • eqqarsaat misigissuseq imal. misigisimaneq suna inuttarititannit takutinneqassava? (ass. annilaanganeq, ernumaneq, ugguarneq, neriuuteqannginneq)
    • Inuttarititat qanoq ateqarpa?
    • Inuttarititat qanoq isikkoqarpa?
    • Inuttarititavit qanoq ilinnut oqarneranut assersuusiorit
    • Inuuninni pisuni inuttarititavit takkuttarneri eqqaniarsarikkit

    Piumaguit inuttarititavit qanoq isikkoqarsorinera aamma titartarsinnaavat.

     

    Skabeloni aamma aasinnaavat immersorlugulu

     

Haluukkut,

Videumi kingullermi paasivat inuttamik pilersitsinikkut eqqarsaatit oqimaatsut oqilisinnaaneri. Tassanilu oqaatigaara uanga nammineerlunga iluaqutigisarlugu, takorloortarakku eqqarsaatit isornartorsiuisut nuannerpallaanngitsulluunniit papikuujuutima oqaatigisarai.

Massakkut illit misigissutsinnut nuannerpallaanngitsunut oqaluttartumut inuttaliortussanngorputit. Imaaliussaatit: Inuttap pilersinniakkavit misigissutsit eqqarsaatilluunniit suut oqaatigisassavai? Imaassinnaavoq ernumassuteqartarneq ilinnut initoorujussuusoq.  Immaqa taava “Ernumatooq Pipa,” pilersissinnaavat. Immaqaluunniit “Nakkarsaasartoq Minik,” immaqaluunniit “Ajorinninniartartoq Kaalat”.

Atit siunnersuutigisakka quianalaarsinnaapput, aamma ajunngilluinnarpoq. Uani pingaaruteqarpoq ernumaneq assigisaalu imaannaanngitsutut isiginaveersaarnissaat. Aamma nalunngilara misigissutsit pineqartut ulluinnarni qanoq ersinartigisinnaanersut, qasunartigisinnaanersut qanorlu ajortisaarisinnaatiginersut. Inuttaliarisavit anguniagaraat misigissutsit eqqarsaatillu ajuissortutut isiginagit atorneqarsinnaalernissaat.

Inuttaliat atsereerukku taava ilusilersorsiinnaalissavat takorlooruminartilerlugulu. Annilaangatitsisartuutit qanoq isikkoqarpa? Qanoq nipeqarpa? Suna immikkuullarissutigaa?

Ernumatooq Pipa sammeqqilaariartigu. Pipa arnaavoq puallataajaraq, pitsaasinnaagaluaqalunilu ernummartoorujussuuvoq. Immaqa taskeqartarpoq, sioqarluni nasaqarlunilu. Pipap nuannarisatuaa tassaavoq toqqissisimaneq. Taamaammat ajoqutaasinnaasunik paasititsinissani suliassatuamisut isigisarpaa. Siunnersuigaangami sajuusalluni aarlererpallunilu ima oqaluttarpoq: “Pisariaqanngilaq. Taamaalioqinak. Toqqissisimanavianngilatit.”

Pipap inuunerit ajortisarniarsarinngilaa. Sianiginiaannaraatinuna, taamaattumik suulluunniit ajutoorsinnaasut takorloortinniarsarisarpai. Oqariartaaseq atortorujussuusaa tassaavoq: ”Ernumanngippallaarnermiit ernumaneq ajunnginneruvoq”. Pipamummi SUUT TAMARMIK toqqissisimanermut mianersornissamullu tunngassuteqarput.

Inuunerli ernumanermiinnaq imaqassanngilaq. Qanorluunniit takorluugarpassuaqarunarputit angusaqarusullutillu. Immaqa angalarusunneq, inunnik naapitsineq nutaanillu ilikkagaqarneq. Taakkunanerpiaq Pipa nakerisaarutsitsisinnaasarpoq, tassami ajoqutaasinnaasunik taakkartuiinnavittarami. Soorunami Pipa arlaatigut ilumoorfeqarpoq. Ilaanni mianersornissaq pissutissaqarluartarpoq. Pipali inuuninni aqutsisoriniarukku, suna tamarmi pikkunaallisinnaavoq nikalllunganarsisinnaallunilu.

Taamaattumik qaqugukkut Pipap tusarnaartarnissaa, qaqugukkullu ingattajaarneranik oqarfiginissaa ilinniarneqartariaqarpoq. Ilinniarnissaq amerlanerussuteqartunut inuuneq naallugu ingerlanneqarsinnaavoq. Piffissalli ingerlanerani ernummatitsinnit aqunneqannginnissarput ilikkariartorsinnaavarput. Tamaaliorutta Pipa aqutsisussatut isiginagu siunnersuisussatut isiginiarsinnaavarput.

Neriuppunga nammineerlutit inuttaliorusulersimassasutit. Videup suliarinerani apeqqutit aallaavigisinnaasatit piareersarnikuuakka. Soorunami Pipakkut papikuujullu isumalunnikkaarsuaq aamma atorsinnaavatit.

Ilinnut titartaanissat pisariinnerussappat aamma annilaangasarnerit assilianngortissinnaavat. Imaassinnaavoq aamma uumasutut takorluukkatulluunniit allatut titartarsinnaagit. Ernumaneq ersinartuusinnaammat imaassinnaavoq assilialiat aamma ersinarsinnaasoq. Taamaaliorsimassaguit immaqa quianartunngortinniarlugu arlaannik ilasinnaavat. Ersinarunnaarsinniarlugu immaqa qingaa eqqumiittunngortissinnaavat, aamma pamiulersinnaavat assigisaannilluunniit. Pipatut papikuujuttullu inuttaliat quianalaarsinnaavoq. Imaanngittoq annilaanngateqartarneq quianartuusoq, kisianniliuna iperaaminiassagakku, quianartutullu isiginiassagakku taamaaliorsinnaasutit.

Videup tulliani eqqarsaatinnut misigissutsinnullu iperaasinnaanissannut periuserisinnaasavit pingajuat kingullerlu tusartissavara. Amerlasuut taanna iluarinerpaajusarpaat. Qilanaarutissaqarputit.

Takuss.