Imarisaanut uteqqigit

Modul 1: Lektioni 1

Annilaanganeq: Ilunni illersuisussat

Lektionip tullia

Opret bruger

Siuariartornermut kaammattuutinik nassitsittarusukkuit atuisutut atit pilersinneqarnerani nalunaarutinik nassitsittarnissat qinersinnaavat.

Suliassaq

Ilunni paarsisut qanoq pissusilersortarpa?

  1. Maanna annilaanganermut paarsisoq kinaassusersivat mianersorpallaatsiartorlu paasillugu.

    Maanna misilillugu kingumut qiviarlutit, ilunni annilaanganermut paarsisut qanga qisuariarsimanersoq isumaliutigiuk. Iluaqutaasimasinnaavoq mianersorpallaarsimasinnaalluniluunniit.

    Pingaaruteqartoq tassaavoq ilunni paarsisuppit qanoq pissusilersornerata ilisimaarilernissaa.

    Sammisassaq 1: Ilunni paarsisut qanoq pissusilersorpa?

    1. Inuuninni ulluinnarnilu ilunni annilaanganermut paarsisuppit ikiuussimaneri paarsingaatsiarpallaarsimanerilu eqqaaniarsarikkit.
    2. Pisut allattukkit. Tamatuma kingorna (eqqaamasinnaagukkit) qanoq eqqarsarsimanitit allakkit, arlaannillu arlaleriartoqarnera maluginiarlugu.

Paarsisoq eqqarsaatigiuk. Nalunngilatit taakku annuttut qernertunik atisallit, præsidentit, paavit erinarsortartulluunniit tusaamasat assigisaataluunniit tunuatungaanni takussaasartut. Taamaattoq seqinersiutinik isaruaqartarpoq nukittuujulluni, suullu tamarmik ajunnginnersut qulakkeerniarlugu avatangiisit alaatsinnaattuartarlugit.

Annilaanganeq paarsisutut eqqarsaatigisinnaavat. Soorunami seqinersiuteqanngitsoq mikrofonitalinnillu siutequteqanngitsoq, ilunnili paarsisutut. Suliassalli nassuiaataat assigiilluinnarput, tassalu illit paarinissat. Paarsisup assigiinngitsorpassuartigut ikiortarpaatit. Immaqa – assersuutigalugu aqqusinermi angallannermi nalunngereerpat.

Takorlooriaruk eqqarsaateqarlutit pisuttutit. Biili assartuut aappalaartoq siuninni ungasinnerulaarluni tunginnut ingerlasoq takunngivippat. Ilunnili paarsisut sillimavoq. Tassanngaannaq navianartorsiorneq paasivaa, aportissanngikkaannilu iliuuseqapallattariaqarnermik timimut nalunaarasuarluni. Tamatuma kingunerisaanik, angumereqqarlugu aporneqaqqunak sanimut pississaatit. Kingorna immaqa eqqarsassaatit: ”Wow, susoqartoq-una? Allaanngilaq timi nammineq aqutsisoq. Uangalu iliuuseqanngivillunga.”

Tassalu taamatorpiaq ilunni paarsisuppit annaappaatit. Taassuma navianarsinnaasoq malugaa, pilertortumillu iliuuseqarnissannik kinguneqarluartumillu ikiorpaatit. Takorlooriaruk, ima eqqarsaannartutit: ”Una biilimi assartuummiittoq iluanngilaq. Biili iluanngitsumik aquppaa.” taavalu allamik iliuuseqarnak tungaanut ingerlaannarlutit. Ajussagaluaqaaq – ilaa?

Allatut oqaatigalugu annilaanganissaq pingaaruteqarluinnarpoq. Ajornartorsiutaasorli tassaavoq ilutsinni paarsisutta ilaatigut anilaangavallaalertittaramitigut, sumilu tamaani soqanngitsumi navianartunik takusaqartalernera. Assersuutigalugu ima suaartaleriataartarnera:

”Naamerluinnaq. Unigit. Uterit. Taamaalioqinak. Ulorianaqaaq. Biili assartuut aappalaartoq puigoriikatappiuk?”, tassa tulliani aniguit ilunni paarsisut kingumut utersaarluni uippalleriasaartalersinnaavoq. Taakku namminneq eqqarsaataannaagaluarput. Immaqalu suliluunniit biilinut apuutinngilatit. Taamaakkaluartoq timivit sillimalernissaanut naammappoq. Soorlu siooranartumi piviusumi.

Eqqarsaatitit, misigissutsitit timinnilu malugisatit maanna tamarmik biilit angallaffianniinnissaq navianarpallaartoq oqaluttuarpata, immaqa taamaatiinnassavat. Massakkorpiaq oqiliallannartutut misinnarnissaa qularnanngilaq. ”Puuha”, qujanartoq imminut paarigama”, immaqa eqqarsassaatit. Siunissarli ungasinnerusoq eqqarsaatigalugu taamaalilluta suut, sumiiffiit pisullu annilaangalersitsisinnaasutut siooragisatta ingalassimaniarsarilernerat ajornartorsiutinik pilersitsisarpoq.

Ilunni paarsisut maluginiaqqusorujussuuvoq. Naalaartuarukku aqutsisikkukkulu, naalagaanialeraluttuinnassaaq. Naggataatigut immaqa marlunnik allorianngitsutilluunniit sioorasaaralunilu kalerrisaarilissaaq.

Ilunni annilaanganermut paarsisuit inuunerit nuanniillisinniarlugu taamaaliunnginnerata eqqaamanissaa pingaaruteqarluinnarpoq. Tunngaviusumik paariniarpaatit. Ilaannili eqqarsarluartanngeqaaq pisariaqanngitsumillu eqqissiviilliortitsisarluni.

Taava annilanganerup taama isiginissaanut siunertaq sunaava? Tassa akeqqatut inuuninnik aserorteriniaannartutut isigissagukku, taava inerniliinissaq ajornassanngilaq tassalu akiorniarneqassasoq imaluunniit qimarratigineqassasoq. Tamatumunngali taarsiullugu annilaanganeq paarsisutut ajunngitsussamik isumaqartutut isigissagukku, annilaanganermik eqqissillutit, inussiarnersumik isumakkeerfiginnittumillu naapitsisalersinnaanermut periarfissaq ammassaaq. Annikitsutut isikkoqarsinnaavoq annertuumilli sunniuteqarsinnaalluni. Annilaanganermit aqunneqaannarnak takkukkaangat qanoq qisuariarfiginissaa nammineq toqqarsinnaanngussavat. Allatut oqaatigalugu: annilaanganermut paarsisuppit oqaasiisa tamatigut upperisariaqanngissaanutk imminut eqqaasissaatit. Oqaatigisaatut iliortariaqannginnerit taamatulli pingaaruteqartigaaq. Tamanna kingusinnerusukkut annertunerusumik tusagaqarfigiumaarpat sungiusarlugulu.

Siullermik annilaanganerup navianaateqannginnerata eqqaamanissaa, massakkorpiaq pingaaruteqarpoq. Aappassaattullu annilaanganerup pingaaruteqarnera. Pingajussaannillu annilaanganerup qanoq inuunissannut aalajangiisariaqannginnera.

Videup tulliani qaqqamut angalaassaagut. Tassanimi suna pillugu annilaanganerup initoorujussuanngorsinnaanera ilinniassavarput.