Annilaanganeq pillugu paasisassarsiornermut tikilluarit

Annilaanganeq pillugu qarasaasiakkut ingerlanneqartumut videomut siullermut tikilluangaarit. Dinamik ateqarpunga, tassaavungalu matumani ilinnik aqqutissiuussisussaq.

Aallarniutitut tuikkut imminut pattalaarallaat. Qujanaqaarmi maaniikkavit.Tamanna neriuuteqarninnut ersiutaavoq, tassa annilaanganerpit oqinnerulersinnaaneranik neriuuteqarneq. Neriuutillu taassumarpiaap attatiinnarnissaa pingaaruteqarluinnarpoq.

Siullermik pingaarutilimmik paasisassaqarputit: Tassalu annilaanganeq tassaammat misigissuseq pissusissamisoorluinnartoq. Annilaangaleraangavit siooranarlunilu iluaattaraluarpoq, navianannginneratali ilisimanissaa pingaaruteqarpoq. Akerlianilli annilaangasinnaanngikkuit aatsaat navianarsissasoq oqartoqarsinnaavoq. Assersuutingalugu nannumik eqitaarisinnaaninnik imaluunniit allamik navianartumik iliuuseqarniarlutit  isumataarsinnaavutit.

Allatut oqaatigalugu annilaanganeq pingaaruteqarpoq. Taassuma paarivaatigut navianarsinnaasunullu illersorluta. Inuilli ilaannut annilaanganeq aqunneqarsinnaajunnaartarpoq. Ikiortaanani killiliisunngoraangat, inuunerlu ajornakusuulersillugu annilaanganeq akeqqatut misiginarsisarpoq. Immaqa annilaangalersinnaanerit siooragalugu arlaannut pisunulluunniit ornigunnaveersaalertarputit. Immaqa ernumavallaalerlutit nukissanik atuivallaalerputit. Immaqaluunniit piumasaqaatit arlaat eqquutsinneqarpata aalajangersimasunik taamaallaat suliaqarsinnaallutit imminut oqarfigisarputit.

Assersuutigalugu aatsaat allamik peqateqarlutit pisiniarfiliarsinnaallutit. Tamakku arlaat ilisarigukkit, taava videoliat ilinnut eqqorluinnarput. Aallaqqaataaniilli unneqqarilluinnarlanga. Tassami maaniinninni imaaliallaannaq annilaanganermik aninguisitsisinnaasumik nassaarnavianngilatit. Annilaanganermi inuunermut ilaalluinnarpoq. Tarnip pissusaanik ilisimasallit oqartarput, tunngaviusumik tallimanik misigissuseqartugut taakkulu ilagaat annilaanganeq.

Sinnerilu tassaapput nuannaarneq, kamanneq, narruginninneq nikallunganerlu. Immaqa imannak eqqarsarputit: ”Taavami sooq videolianut malinnaallunga piffisara atussangakku?” akissullu naatsoq tassaavoq: Annilaanganerit inuunissannut ilinnullu pingaarutilimmik

ingerlataqarnissannut akornusiisinnaajunnaarsillugu isummerfigisinnaanissaa ilinniarsinnaagakku. Annilaanganeq iluaaginarmat siooranarmallu qimarratigisarluguluunniit akiorniarsarisarparput. Tamannalu ajunngitsumik isumaqaraluarpoq. Taamaalillutami siooranartut avataaneersut iliuuseqarfiginissaannut sananeqaatingaarput. Iluaatsulli ernumanartut-, misigissutsit- maluginiakkatullu ilutsinninngaanneersuuppata, qisuariaatsit taamaattut iluaqutaannginnerat ajornartorsiutaavoq. Akerlianimmi annilaanganeq sakkortunerulersittarpaat ilutsinnilu initunerulersittarlugu.

Taavami suna alla videoni sungiusarsinnaaviuk? Siullermik eqqarsaativit misigissutsivillu illiunnginnerisa takusinnaanissaa – taakkulu oqaatigisaasa naalattariaqannginnerat sungiusassavat. Aappassaanik annilaanganerup iluaatsortaatalu pinaveersaarneraniit, inuuninni ilinnut pingaaruteqarnerusoqarneranik imminut eqqaasinnissat.

Massakkorpiaq ima eqqarsaleqqajaasarpugut: ”Qanorluuniit akeqassagaluarpat annilaangajunnaarniarpunga”. Tamannalumi paasinarluinnarpoq. Avataaniillusooq ataatsimut isiginiarutsigu, annilaangajunnaarniarnerup siunissaq ungasinnerusoq isigalugu akisuallaarajussuarnera ersarississaaq.

Tamatumunnga taarsiullugu – annilaangalersitsigaluarpataluunniit – ilinnut pingaarutilinnik eqqissillutit aallartitsissaatit. Tamanna nuannaarnermik isumaqarnermillu pilersitsisarmat, illillu nammineq inuuninni naalagaanerpit ilisimanera imminut tatigilersitsillunilu nukissanik tunisisarmat. Aammali qanoq inuunissannik aqutsisikkunnaarukku, annilaanganerup qaangiukkiartuaarnera misigilerumaarunnarsigakku.

Unammillernarsinnaanera imaluunniit inissaqartikkuminaannera paasisinnaalluinnarpara. Aammalumi ima eqqarsassaguit tulluarluinnarpoq: ”Qanoruna innersunga paasinngilluinnaraa? Annilaanganermi aqussinnaanngilara.” Paasisinnaaqaakkit, annilaanganeq qanoq siooranarsinnaatigalunilu iluaassinnaatigisoq nalunngilara. Aamma oqanngilanga ajornanngittuaraasoq. Maanili periutsit ilisimasallu pissarsiassatit inunnut allarpassuarnut iluaqutaasarsimasut nalunngilara. Annilaanganerup inuunerit isumaarutsittariaqanngilaa nikallungalersillutit imminullu naammagiunnaarsillutit. Allamik aqqutissaqarpoq. Taanna tassaavoq marluulluta paasiniarlugulu sungiusagassarput.

Matuma qanoq aaqqissuussaaneranik modulinilu ataasiakkaani suut ilinniarnissaat pillugu tulliani Videomi oqaluttuutissavakkit.

Massakkorpiaq naggasiillunga assut tikilluaqqoqqippakkit. Maaniinnerit nuannaarutigaara.

Takuliiv.