Inuulluarit matumuunalu qujanaq

Haluukkut. Videullu naggataannut tikilluaritsi.

Assigiinngitsorpassuit aqqusaarpagut.

Ilaatigut paasivarput annilaanganeq inuunermut ilaaginnartoq. Annilaanganeq akeqqatut isiginagu qaratsanni paarsisutut isiginissaanut siunnersorpakkit. Ajoraluartumilliuna paarsisuutitta paarerusungaaramitigut ilaatigut aarlerinartoqanngitsoq aarlerilertittoortaraatigut.

Aamma paasivat annilanganeq pisariinnerusumik isiginissaanut eqqarsartartussaallutit eqqarsaatitit misigissutsitillu kinaassuserinnginnakkit. Inuunitta ingerlanerani eqqarsaatit namminneq takkullutillu ingerlasarput, ingerlaannartikkaangatsigit. Ajornartorsiulersinnaasarpugulli eqqarsaatigut aqutsilersuuleraangata, immaqaluunniit immitsinnut oqaluutileraangatta eqqarsaatit misigissutsillu atukkagut atoqqusaanagit. Qujanartumik eqqarsaatigut misigissutsigullu avataanit qivialaarnissaat ilinniarnikuuarput. Eqqarsaatit misigissutsillu nuanniittut taamaaliornikkut tammarnavianngillat, kisianni tiguartippallaarnaveersaarsinnaavugut aqunneqarnaveersaarsinnaallutalu.

Aamma paasereersimalerpat, inuuninni pingaartitavit naleqartitavillu suuneri unikaallallutit isiginiarnissaat eqqarsaatiginissaallu. Imaassinnaavoq massakkuffaarik annilaanganeq inituallaalersoq, iperarnissaanullu qanorsuaq iliuuseqarusuttutit. Misigissuseq nuanneranilu ersinaartuummat taamatut qisuariarneq nalinginnaasuuvoq. Piffissarli ungasinnerusoq isigissagaanni, piffissamut qaninnerusumut iliuuseqarneq eqqortuujuaannangilaq. Pinngitsoornak inuuninni takorluugarpassuaqarlutillu kissaaterpassuaqarputit. Aamma suut angorusunnerlugit, suullu misigerusunnerlugit aammalu inuunerit qanoq ittuutikkusunnerlugu ilisimasssajunnarsivat. Taakkua ulluinnarni ingerlavissaqarnissannut iluaqutaasinnaapput, ilaatigullu imatut imminut aperisinnaavutit: “Iliuuseriniagara una anguniakkannut qanillititsissava immaqaluunniit ungasillisitsissava?”

Ersigisannik ingerlatsisinnaalernissannut eqqissiivillutit qanoq periuseqarsinnaanerlutit aamma paasisaqarfigivat. Uani tupinnartortaa uaniippoq, unammilligassaq suugaluarnersoq unamminarpasittorujussuaq annikittualunngorlugu agguarneqarsinnaasoq, iliuuseqarfigineqarsinnaallunilu. Ilaatigut imminut aperisinnaavutit: “Ullumi sapaatip akunneraniluunniit matumani anguniakkannut alloriarnissannut minnerpaarpaaffik suua” Taamatut ingerlatsinissamut sapiissuseqarnissaq naammagittarsinnaassuseqarnissarlu pingaaruteqarput. Taamaattumik nuannersumik imminut ingiaqatigisinnaanerup ilikkarnissaa pingaaruteqarluinnarpoq. Amerlasoorpassuussut immitsinnut naalliutsittarpugut. Qujanartumilli immitsinnut isoriniaannaavinnginniassagatta immitsinnullu isumassorsinnaaniassagatta ilinniarsinnaasatsinnik periuseqarpoq. Taakkualu ingerlatatta naammassilernerani aqqusaarpagut.

Maannakkullu naammassinialerpugut. Neriuppunga imminut tuikkut pattalaarluassasutit. Nersualaartariaqarputimmi. Ingerlatatsitut ittumik ingerlatsisinnaanerit, nukissaqarfigisimaneralu torrassuuvoq. Taakkualu imminerminni neriuummik nukissamillu takutitsipput, pilersitatit paarilluarniaannassavatit. Aamma inuit allat ilittulli annilaanganeq nalaatereernikuuaat, iluaallannikuullutillu. Eqqaamallugu ikiorneqarnissannut periarfissarpassuaqarmat. Aallartikkatta oqaatigaara annilaanganeq kisivit pigiinnartariaqanngikkit. Allat paasitittariaqarpatit qanoq inissisimanerlutit. Taamaalillutit eqqarsaatit nuanniinnerusut aqqusaassanngilatit, eqqarsaatigisatillu ersinannginnerulersinnaallutik. Naak ilaatigut ikioqqunissaq sapernarsinnaagaluartoq, misilittariaqarpat. Inuit amerlanerpaat ikiorneqarnissaq pisariaqartikkipput paasingaangamikku ikiuerusuttarput. Soorlu immaqa illit nammineerlutit ikinngutit ilaquttalluunniit pisariaqartitsisoq ikiornikuugit.

Ingerlatat una pillugu oqaasissaqaruit siunnersuutissaqaruilluunniit soorunami tusagaqarfigerusupparput. “Giv feedback” toorlugu nalunaarfigisinnaavatsigut. Taanna quppernerup matumani naggataani takusinnaavat.

Qujanarujussuaq matumannga ingerlatsigavit, ingerlalluarnissannillu kissaatingaarpakkit. Neriuppunga ingerlatsinerput iluaqutigisimassagit.