Inuppassuit saallugit oqaaseqarneq misilinnikuuiuk?

Aallaqqaammut immaqa ilunni nipi ima oqartoq tusaasimassavat: “Naamik. tassa. Uterit”. Taamaaliortuaruilli annilaanganerit annikilliartussaaq. Taavalu killilersugaannginnerujusuullutit qasukkarsimanerujussuullutillu oqalussinnaaleriataassaatit.

Sunnertinneq aamma taamaappoq: Taama annilaanganartiginnginnerata qaratsannit ilikkarneqarnissaata tungaanut, imminut annilaangalersittaqattaarneq.

‘Naamik uanga qujaannarpunga …’, immaqa eqqarsassaatit.

Eqqissiinnarit. Matumani isumaasoq tassaavoq uippallernarpallaaqqunagu annikitsumik aallartinneq. Tulleriiaarineq.

Paaserusuppiuk? Maanna tusassavat …

Sunnertinnermut najoqqutassaq naatsoq

1. Iluarisannik ikiortissarsiorit

Kisimiillutit sunnertinniarsinnaalluarputit, tamatigulli tapersersortissannik ikiortissarsiniarnissat innersuussutigaarput. Sunnertinnermi ilungersunarsinnaavoq.

Tilluuttartuuneq takorluulaariaruk. Tassuugu tilluuttarfimmut qaqissaatit, tassanilu utaqqivoq akeqqatut siooraginerpaasat. Nukissuarnik ulikkaartoq 150 kiilunillu oqimaassusilik. Toqqaannaq saassukkaluarukku unatartingaatsiassaqaatit.

Taavami qanoq iliussavit?

Sungiusaasut peqatigalugu isumatuumik pilersaarusiussaatit. Tilluuttarfimmiinninni ammut qiviarlutit takusinnaavatit ikinngutitit illersuillutik nilliasut. Tassanngaannaq nukissaqarnerulernerit sapiissuseqarnerulernerillu malugilerpat.
Inunnut taamatut iluatsitsinissaat ilimaginngisanut – isumatusaarlutik, uteriillutik ikiorneqarlutik tapersersorneqarlutillu aniguisimasunut assersuutissarpassuaqarpoq. Annilaangagaanni aamma taamaappoq.

Annilaanganeq immaqa anigugassaanngitsutut misigineqarsinnaagaluarpoq. Tapersersorluarneqarnikkulli ajornannginnerussaaq. Immaqa illit ikinnguteqarputit, ilaqutaqarputit imal. ilisarisimasaqarputit, ilinnik illersueqataasinnaasunik tapersersuisinnaasunillu? Sunnertinneq misilinnialerukku taakku saaffigikkit tapersersorusussaneraatsillu paasiniaruk. Ass. pilersaarusiornikkut ikiuussinnaapput allaallu aallartinnialeruit immaqa ilagalutit.

Ikiorneqarnissannut aqqutissiuunneqarusuppit? Annilaanganeq pillugu allaaserisarput alakkaruk: Siunnersuutit pitsaasut aqqaneq marluk ikiortissannillu imal. tapersersortissannik pissarsivigisinnaasatit tallimat. 

2. Aallarniutaasumik sungiusarfissannik arlaannik toqqaagit

Immaqa annilaanganerit inuuninni assigiinngitsutigut sunniuteqarpoq. Oqinnerulernissaalu kissaatigissajunnarsivat. Najoqqutarissalluguli pitsaasoq tassaavoq tulleriiaarineq. Suut annikitsunnguakkuutaaraanni paasiuminarnerulersarput iluatsitsinissallu ajornannginnerulersarluni. Inuunermi sutigut tamatigut tamanna atuuppoq. Aamma annilaanganermi. Taamaammat annilaangaleraangavit killiliisartut pingaarnerit arlaannik ataatsimik toqqaagit. Taannalu aallarniutigiuk.

3. Ernumassutitit paasiniavigikkit

Assersuusioriarta. Malik-ip inunnut akulerunnissaq annilaangagaa . Taamaammallu ilaatigut klassimi ilaminut saqqummiussinissaani, pisiniarfiliarnissani allallu isigisut nerinissani ajornartorsiutigaa

Malik aalajangerpoq pisiniarfiliarnissamut annilangasarnini siulliullugu iliuuseqarfiginiarlugu.

Annilaanganini paasilluarumallugu Malik maanna pisiniarnermut attuumassuteqartunik takorluuissaaq. Ikinngutigilluakkani Angutinnguaq pilersaarutip eqqarsaatersuutiginissaanut ikiuukkusunnersoq aperaa. Angutinnguup Malik aperaa:

• pisiniarfiup silataanniinneq qanoq issava?
• Pisiniarfimmut iserneq qanoq issava?
• Siuleriiaarlutik utaqqisut akornanniinneq qanoq issava?

Soorlu tamakku.

Tulliuppoq Malik-ip ernumassutiminik kisitsisitaliinissaa. Pisoq eqqarsaatigalugu eqqissisimalluinnartutut misigiguni, 1-imik kisitsisitalissavaa. Akerlianilli eqqarsaatigiinnarlugu annertuumik sunnerneqaruni, 10-mik kisitsisitalissavaa.

Tamaaliornikkut Malik-ip ernumassutini majuartarfiliuutissavai. Majuartarfiup tummeraani allermi annilaangatitsivallaartanngitsut inissinneqassapput. Taakku ilaat tassaasinnaavoq pisiniarfiup assinganik isiginnaarneq. Tummeqqami qullermi Malik-ip siooraginerpaasai inissinneqassapput.

4. Tulleriiaaralutit annilaanganerit unammilleruk

Sunnertinnermi isumassarsiaq tassaavoq annilaanganerpit unammillernissaa. Kisiannili tummeqqami susinnaanngivissutut misigiffinni pinnak. Taamaammat nalinginnaasumik pisuni ernumassutsip tummeraani allerniittumi aallartissaatit tassanngaanniillu kigaatsumik majuarlutit. Taamaaliornikkut kigaatsumik annikitsut ajugaaffigisalissavatit- malunnartissinnaasatit- ineriartuutissatit.

Ass. pisiniarfiliarnissaq assut annilaangagigukku, taava pisiniarfiup assingi isiginnaaqqaarsinnaavatit.

Kingorna immaqa ikinngutigilluakkat ilagalugu taakunnassaasi. Silataani issiavimmut takisuumut ingillusi qanoq innerit oqaloqatigiissutigilaarsinnaavarsi. Immaqa taava kingorna inoqarpallaannginnerani pisiniarfimmut isersinnaavusi. Taamaalioruit soorunami annilaanganerit annertusissaaq. Tassaniiginnatsiaruilli annilaanganerit isumaminik annikillilaassaaq. Tassalu pingaarnerpaaq.

Immaqa marlussoriarlusi ikinngutillu pisiniarfiliassaasi inoqaruloornerata nalaani. Piffissanngorumaarporlu pisiniarfimmut kisimiillutit isernissamut immaqa piareerfissat. Tamatumani annilaanganerpit isumaminik annikillinerata maluginissaata tungaanut tassaniiginnarnissat aamma pingaaruteqarpoq. Ass. aallaqqaataani misigisanniit affaannanngorluni.

Sungiusaatissat aamma alakkakkit: Anersaartornermi periuseq atorlugu annilaanganeq supillugu anillatsiguk .

Taamaammat sunnertinneq iluaqutaavoq: Pitsaanngitsunik eqqarsarnissamut aalajangersariigaavutit

Ilisarissajunnarsivat: Eqqarsaat takkuppoq. Tassanngaannarlu ernumassuterpassuit takkussuupput.

Siullermik- tamanna pissusissamisoorluinnartoq ilisimassavat. Inuit isumatuut oqarput uagut inuit pitsaanngitsunik eqqarsartussatut ajornerpaamillu pisoqarsinnaaneranik takorluuisussatut aalajangersariigaasugut.

Sooq?

Qangaaniilli aniguisinnaanerput annerulersittarmagu. Aataqqiuteqqiutit piniariartilluni arlaannik malugisaqaruni, ajussaaq ima eqqarsassappat: ‘Hmmm, soqarnavianngilaq’. Naamik pitsaanerujussuuvoq ima eqqarsarneq: ‘Nanuunissaa ilimanarpoq. Sillimaniarlanga’.

Illilli ullumikkut allatorluinnaq inuuvutit. Nannunik sumi tamaani qamasoqanngitsumi. Taamaammat aarleriuarnissaq pitsaavallaanngilaq.

Takorluukkatit piviusuunersut paasiniakkit

Taavami qanoq iliussavit? Tjah, qaratsat itsarsuarli pisunik tunngavilik taarsersinnaanngilat. Eqqarsaatit tamaasa upperisariaqannginnerat ilinniarsinnavat. Tamatumanerpiaq sunnertinnerup ikiussavaatit. Misiliinikkummi eqqarsaatitit piviusuunersut paasiniarsinnavat. Annilaangagisartakkannik imminut misigitikkuit qanoq pisoqassava? Siooragisattut ajortigissava? Imal. ernumassutitit ingasattajaarnerusut paasinarsissava?

Ingasattajaarnerusut paasigajussavat. Tamatuma annilaanganeq angakkuakkatut isillugu tammartinnavianngilaa kisiannili eqqarsaatit eqqarsaataannaanerat, taakkulu inuuninnik aqutsisuusariaqannginnerat ilikkassavat. Taannalu nammineq peqqinnerulernissamut alloriarneruvoq pingaaruteqarluinnartoq.

Qarasaasiakkut neqerooruterput akeqanngitsoq annilaanganermut tunngasoq misiliguk

Neqeroorut akeqanngilaq atuisunngoqqaarnissarlu piumasaqaataanani. Taamaalillutit videot siulliit malinnaavigalugit ullumikkut aallartissinnaavutit. Namminerlu qanoq sivsussuseqarnissaa aalajangerlugu ingerlaqqillutit. Qarasaasiakkut ikiorneqarneq pillugu annertunerusunik paasisaqarniarlutit ataani video takuuk: